Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori

* Davantal
* Bibliografia
* Testimonis
* Aparat crític
* Traduccions

 

Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Codi: 167,042=016,019 Autor: Gaucelm Faidit, Albertet Gènere: Tenso Número: 69

 

N’Albert, eu sui en gran error

I 1
N’Albert, eu sui en gran error
    d’aquestz dos cortes plaiz jujar :
    que doas domnas per amor
    volgron lor cavaillier baisar ;
  5 e l’una no l’auset far
    anz comenset a se plorar ;
    e l’autre no se poc mudar
    qe non complis tot son talen.
    Digatz me so qe-us n’es parven :
  10 cal en deu mais l’amics lauzar
     
II  
Seingner, cela fez mais d’amor
    que no se-n saup amesurar,
    e deu aver mais de lausor
    per l’amic, si ben o volc far,
  15 c’az aventura-s volc gitar
    per son bon amic gazaingnar ;
    molt la-n pot mais l’amics amar,
    car no-i gardet foldat ni sen ;
    e dic vos, per mon jujamen,
  20 que forsa d’amor li fez far
     
III  
N’Albert, vos e-ill autr’ amador
    volez ades torz raissonar :
    cum podez dir qe per follor
    deia mais druz sa domn’ amar ?
  25 si-ll domna saup de malestar
    si ne son bon amic gardar,
    molt la-n deu mais l’amics prezar
    car se-n cuberc, ab jauzimen ;
    e-ill vostres fez tan follamen
  30 qe-l mariz l’en degra laissar
     
IV  
Seingner, eu tenc leis per meillor
    que no-i saup geing ni voutas far,
    que li fais e-ill galliador
    se saben cubrir e laissar,
  35 e hom no pot cor devinar 
    … … … … … … … .
    c’atreissi pogr’ on mal penssar
    cella que ploret simplemen ;
    mais cill non ac galiamen
  40 que volc tot son cor demonstrar.
     
V  
N’Albert, li fezel amador
    qui-ls plaiz d’amor sabon jujar 
    preson pro mais l’amoros plor 
    tan gen saup son fin cor passar ; 
  45 amors no pot gaire durar
    qi no-l sap cubrir ni celar, 
    e cill qe no-s volc capdelar
    fez vas son amic faillimen
    e vas si mezeis eissamen ;
  50 per qe-l druz l’en degra encolpar. 
     
VI  
Seingner, si-l plorars ha sabor 
    eu no sai fort ben aesmar : 
    sofferc per ben o per dolor
    o per sobrars de trop amar ? 
  55 Mais qui vol ses deuptes pagar
    no-l deu om lonjamen tirar, 
    que so q’es faiz non es a far ; 
    don dic eu qe val per un cen 
    cill qe pag’ amorozamen,
  60 e meillz se-n pot l’amics fiar.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI