Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 248,086 Autor: Guiraut Riquier Gènere: Vers Número: XXXIV

 

Christïan son per Ihesu Crist nomnat

I		Christïan son per Ihesu Crist nomnat,
		lo filh de Dieu; qu’elh venc mostrar la via
		de salvamen: qu’om salvar no·s podia
		tro qu’elh obret drechura e vertat;
	5	e mandet patz, lïaltat et amor
		e karitat e merce ab valensa
		d’un ad autre, humilitat, crezensa,
		don son mundat ab esper peccador.
II		Mas tant son lunh de mundar peccador
	10	qu’a penas fai baratz ad un temensa,
		ni sap que s’es razos ni conoyssenza,
		ni dreitz ni patz, ni enten en amor;
		ans es quascus tant sosmes a peccat
		qu’a penas sent son dan ni·l ve ni·l tria,
	15	ni conoys ver, merce ni cortezia,
		qu’ans vens lo pus poders ab voluntat.
III		A penas es poders ses voluntat,
		et a voler falh poders nueg e dia;
		qu’om en voler a penas se fadia,
	20	e nonpoders te voler enbargat:
		donc quasqus gar quant y fa per amor
		de Dieu el mun, e quon salvars l’agensa,
		e quo·l tanh noms de Crist que pres naissensa
		e mort per selhs que·l son fin amador.
IV	25	Mais son l’amat que no son l’amador
		de Dieu, e par –tant nos fa gran sufrensa
		quar no·ns punis segon nostra falhensa–
		que dreitz fora; mas sofre per amor;
		per qu’em lo pus el sufrir enganat,
	30	quar no laissam del tot nostra folhia
		que conoyssem, e temors no·ns chastia
		del iorn on tuch serem per drech iutjat.
V		Christz, filhs de Dieu, per qui serem iutjat,
		que per salut del poble que·s perdia
	35	nasquist del cors de la verge Maria,
		e resceubist greu mort per caritat,
		e pueys, ressors, confortiest per amor
		tos discipols: senher, dona·ns sabensa,
		qu’en la via vera, per penedensa
	40	de nostres iorns, finem en ta lauzor.
VI		No pot esser vera patz ses amor:
		quar d’amor ven lïaltatz, conoyssensa
		e drechura, patz e perdos d’ofensa;
		mas fin’amors el mon gaire no cor.
VII	45	A la verge, digna maire d’amor,
		de qu’ieu ai fag Bel Deport, si l’agensa,
		coman mi eys, e no·m gar ma fallensa:
		per karitat prec per me·l salvador.
VIII		Maires de Crist, fai nos de precx valensa,
	50	si·t plai, ab luy, qu’elh nos guid’en s’amor.