Kolsen, Adolf. Trobadorgedichte: Dreissig Stücke altprovenzalischer Lyrik. Halle: Max Niemeyer Verlag, 1925

[CdT en procés d'incorporació]

Codi: 167a,001 Autor: Gauceran Gènere: Tenso Número: 8

 

Cozin, ab vos voil far tenzon

I	1	Cozin, ab vos voil far tenzon
		E digatz mi s'a vos er bon
		C'una domn'ab bella faizon
		Vos colg ab se per tal razon
	5	Qe'lh laissetz manentia.
II		En Gauseran, se Deus be·m don,
		Per nulla dompna jus del tron
		Non laissarai a far mon prou.
		Anz voil esser rics hom que son
	10	Que pecs ab cortezia.
III		Cozin, per domna val hom mais
		E n'es plus cortes e plus gais
		E·n fai hom guerras et essais,
		E s'avia d'aver mil fais,
	15	A la mort no·il valria.
IV		Ja no m'en fara col ni cais,
		En Gauseran, q'ieu per un lais.
		Donc qant eu ai, m'es ops e mais ;
		Qe de l'aver m'en vest e·m pais
	20	E meillur chascun dia.
V		Cozin, be mal sabez chauzir ;
		Q'enanz volria ieu tenir
		Avinen domna senz vestir
		Qe tot l'aur ni l'argen de Tyr
	25	Ni cel del rei d'Ongria.
VI		Eu Gauseran, al mieu albir
		Maint home n'avem vist faillir,
		Qan fai de lo sieu descusir
		Lo chauziment e d'escarir
	30	Per q'ieu no·m desfaria.
VII		Cozin, car etz tant malapres,
		Ja non volgr'eu taizessetz res
		Qe per domn'es hom meilz apres.
		L'aver vos lais ; q'ieu no·l vol ges
	35	Et esser ses amia.
VIII		En Gauseran, qant auretz mes
		Tot vostr'aver e vostr'arnes,
		Non auretz de las domnas ges
		Lo jaser ni nuls autres bes
	40	E seretz ses amia!