Kolsen, Adolf. Trobadorgedichte: Dreissig Stücke altprovenzalischer Lyrik. Halle: Max Niemeyer Verlag, 1925

[CdT en procés d'incorporació]

Codi: 167,061 Autor: Gaucelm Faidit Gènere: Canso Número: 15

 

Tot so qe·s pert els truans amadors

I	1	Tot so qe·s pert els truans amadors,
		Car m'a trobat franc e d'umil parvensa,
		Torna de mi ab sobramar Amors ;
		C'aora·m fai sobramar ab temensa
	5	Leis cui non platz. Doncs am eu follamen ?
		Non fatz, per que la fondat tenc a sen,
		E d'amor taing qe lai o·il plaira venssa
		E que sia sens e plazers e gratz
		So q'a sazos par en aire foudatz.
II	10	Ab aital geing n'a hom maint bel socors ;
		Mas jes a mi, quand be n'ai sovinenssa,
		Nom par sia mas destrics e follors
		D'amar celieis on non trop mantenenssa.
		E per que l'am ? Car no·n part mon talen ?
	15	Non puosc; q'en mi no n'ai poder nien.
		C'Amors lia, qe·m mostra sa valenssa
		Els bels semblans e las franchas beutatz,
		Ab qe·m forssa. Pero la forssa·m platz !
III		Be·m deu plazer, car sobre las gensors
	20	Es sos gens cors ab simpla captenenssa,
		Humils e francs e sos vezers doussors
		C'ades on plus la vei, e plus m'agenssa.
		Sol aitan n'ai'e·l desir eissamen,
		No n'ai doncs pro ? Ja sui sieus finamen !
	25	Ben volgra miels ; mas no n'a·i entendenssa,
		E s'aisi fos cum es ma voluntatz,
		Pois eu ben am, atressi for'amatz.
IV		Ja no m'ames, sol car l'am, m'es honors ;
		Tant es en lieis sabers e conoissenssa,
	30	Gens acuillirs, sens e pretz e valors,
		E gran beltat, don el mon non a tenssa,
		Cortesi'a e gaiess'e joven.
		Mas ops m'agra qe·m fos d'autre parven
		Lo jorn c'Amors me mes en sa tenenssa ;
	35	Q'era non vol q'en si'enamoratz
		Ni eu no·m puosc virar vas autre latz.
V		Doncs que·m farai ? Tot aisso m'es errors,
		Q'ella no·m vol ni autra no m'agenssa !
		No sai, per Crist. Mas s'ieu anc fui aillors
	40	D'orgoillos cor, ara·n fatz penedenssa ;
		Qe·il bella·n pren per totas vengamen,
		Qe·m pauset ja en bon esper jauzen.
		Car una vetz m'o ac en covinenssa
		Que m'autrejet s'amor e son solatz,
	45	Mas era·m di qe anc non fo vertatz.
VI		Ab tot aisso me ve tant grans temors
		De lieis celar qe be·us dic ses faillenssa
		Qe maintas vetz m'en tol dormir paors.
		Tant m'es al cor s'amors que a presenssa
	50	Dopte disses son bel nom en dormen,
		Que de mi·m gart e de tot'autra gen,
		Seign'en Dalfin, e s'agues entendenssa
		Que ja nuill temps li plagues m'amistatz,
		Tot lo maltraich volgra sofrir en patz.
VII	55	Na Mieills-de-ben es flors d'enseignamen,
		Dompna de joi, rehina de valenssa,
		Seignoressa d'onors e de beutatz,
		Per q'ieu nom puosc partir mas voluntatz.