Kolsen, Adolf. Trobadorgedichte: Dreissig Stücke altprovenzalischer Lyrik. Halle: Max Niemeyer Verlag, 1925

[CdT en procés d'incorporació]

Codi: 210,006 Autor: Guillem de Berguedan Gènere: Sirventes Número: 16

 

Bernartz diz de Baseill

I	1	Bernartz diz de Baseill
		Que·s fara trobaire
		E no s'en meraveill
		Hom de son repaire ;
	5	Car ben e gen sap trobar
		E moz e coblas laçar,
		Per qe·m par
		Que de totz penra venjanssa
		De paraulas e de lanssa
	10	E non er per lui celat
		De laic ni de coronat.
II		Ges no s'en engrondeill
		Ni nebotz ni fraire
		De Salsas tro Areill ;
	15	C'us no s'en poc raire.
		Que mal se saubron venjar
		D'en Berengier de Monclar
		Que nafrar
		Lo cuidet per mi la panssa.
	20	No·l sabrez, qui no·l romanssa,
		Que de premiers fo abat,
		Mas pois a apostatat.
III		Ab peiras et anels
		Et deniers de borsa
	25	Com conquerretz castels
		E prenez per corsa
		Ses ausberc e ses escut ?
		Per qe tot me par perdut !
		Tal sai drut
	30	Que porta cofa cornuda
		E sai be cals es sa druda ;
		Mas no l'en voill descobrir,
		C'oms son qe·m tem de maldir.