Kolsen, Adolf. Trobadorgedichte: Dreissig Stücke altprovenzalischer Lyrik. Halle: Max Niemeyer Verlag, 1925

[CdT en procés d'incorporació]

Codi: 238,002 Autor: Guionet Gènere: Tenso Número: 18

 

En Raembaut, pron domna d'aut paratge

I	1	En Raembaut, pron domna d'aut paratge
		Bell'e plazen amon per drudaria
		Dui cavallier qi son d'engal lignatge ;
		Mas l'us a pretz de gran cavallaria
	5	E no n'ha plus nul autre fag valen,
		E l'autres ha totz bes enteiramen,
		Mas volpils es. Digatz, al vostre sen,
		Del qal d'ambdos deu miels esser amia.
II		En Guionet, mout es miels d'agradatge,
	10	Al mieu semblan, a pron domna complia
		Cel q'es adregz, plazenz, de bel estatge,
		Larcs e cortes e senes villania.
		Aqel vos dic qe val mais per un cen
		A la dompna e l'es plus d'avinen.
	15	Qar non es dregz per sol un honramen
		Dei'om aver bona domn'em baillia.
III		En Raembaut, cel q'es d'ardit coratge
		Met per sidonz son cor, e semblaria
		Q'el enmezes l'aver ; qe plus car gatge
	20	Non pot metre, e lauzon chascun dia
		Rotlan pels colps e per l'afortimen,
		Per qe deu meils jazer ab son cors gen
		L'amics arditz qe cel qe vai fugen ;
		Qe sol ab leis jazer non auzaria.
IV	25	En Guionet, domnas han en usatge
		C'ab gen servir et ab bella paria
		Conqier'hom mais q'amic brau ni salvatge.
		No volon ja en la lur compagnia
		Mas bar cortes, adreg e conoiscen,
	30	Per qe·l larcs taing qe n'aia jauzimen
		Miels qe l'arditz avols ; qe van dizen
		Qe combatre non pot hom qada dia.
V		En Raembaut, aitan gran poderatge
		Ha l'ardimens, qe ja gran seignoria
	35	Non conqerra nuls hom per volpillatge,
		Et Alixandr'en trac per garentia.
		Per qe val mais a dompn'e l'es plus gen
		Qe am l'ardit ; qe cobeitatz d'argen
		Diria hom qe l'en dava talen,
	40	S'ella·l malvatz temoros retenia.
VI		En Guionet, l'amics ten dreit viatge
		Q'ab largueza, qe·l reis Paris fasia,
		Hac Elena e trais de son estatge,
		Q'anc no·i fes colp de s'espaza forbia,
	45	E dels amantz poiria comtar cen,
		Qi foron drut per atrestal coven,
		Per qe domna deu amar drut plazen ;
		Q'Amors non vol q'om raube ni aucia.
VII		En Raembaut, fassa·n lo jutjamen
	50	N'Aïcelma, qar ha·i fin pretz valen,
		E digatz li qe li membre qom gen
		Si fai ensems arditz ab cortezia.
VIII		En Guionet, et ieu voil eissamen
		N'Aïcelma, car ha·i fin prez valen,
	55	E digatz li qe largueza e sen
		Acoil Amors e no·il platz vilania.