Branciforti, F.. Le rime di Bonifacio Calvo. Catania: Università di Catania. Biblioteca della Facoltà di Lettere e Filosofia, 1955

[CdT en procés d'incorporació]

Codi: 101,003 Autor: Bonifaci Calvo Gènere: Canso Número: I

 

Er quan vei glassatz los rius

I	1	Er quan vei glassatz los rius,
		e·l freitz es enics e fers,
		que cotz e fen, sech'e trencha,
		chant eu trop miels q'en abril,
	5	q'encontr' amor, que tot m'art,
		m'aiuda·l temps que·m refreia,
		per que tant no·m greva·l fuecs.
II		Doncs pois ar m'es agradius
		lo temps, farai un nou vers
	10	d'amor, que·m dona l'empeincha
		vas un gai cor seingnoril,
		gent, complit, de bel esgart;
		e si lai mos cors espleia,
		lo maltraigz m'er gaugz e iuecs.
III	15	Si fara qu'anc non fo vius
		hom, tant fos aclis ni sers
		vas sidons, car ieu, ses fencha,
		am ab fin cor e humil
		lo sieu prezat cors gaillart;
	20	e s'er mos vols no·m autreia,
		crei que venra·l temps e·l luecs.
IV		Per que son vuegs et esquius
		d'autr'amistat et estiers,
		e fics plus que·il negra teincha
	25	vas leis, cui mos precs apil,
		c'aissi, con lo sieu, mi gart
		dal greu turmen que·m guerreia
		tant, que·n sui pro vetz blancs gruecs.
V		E tant m'es sobriers sos brius,
	30	Que·m par qe·m fraingn'e·m travers,
		per qu'er tost ma forz'estencha,
		s'Amors no·m socor; mas il
		non o fai, viatz ni tart!
		Mas zo·m fraing tot e·m peceia,
	35	qe nul temps no me·n fail luecs.