Branciforti, F.. Le rime di Bonifacio Calvo. Catania: Università di Catania. Biblioteca della Facoltà di Lettere e Filosofia, 1955

[CdT en procés d'incorporació]

Codi: 101,004 Autor: Bonifaci Calvo Gènere: Sirventes Número: VI

 

En luec de verianz floritz

I	1	En luec de verianz floritz
		e foillatz,
		volgra per champs e per pratz
		veçer lanzas e penos,
	5	et en luec de chanz d'auzeus
		auzir trompas e flauteus
		e granz retinz de colps e de cridanz,
		c'adoncs fora cabalos lo mazanz.
II		Bel m'es lo retinz e·l critz
	10	dels armatz,
		can sui ben encavalgatz
		et ai bellas garnizos;
		c'aitan gais sui et irneus
		a l'encontrar dels tropeus,
	15	com li privat en chambras e parlanz,
		e tan volgut con il en cochas granz.
III		Per qu'eu volgra fos partitz
		lo prezatz
		reis n'Anfos de sos reingnatz,
	20	qu'adoncs faria dels pros
		e dels valenz sos chapdeus,
		qu'en faitz perillos, ni grieus
		non ten pro lauzenziers, ni sopleianz,
		c'al maior ops li fail cors e talanz.
IV	25	Mas trop mi par endurmitz -
		que·m desplatz-,
		car en vei desconortatz
		los sieus e meins coraios;
		e s'ara, mentr'es noveus
	30	l'afars, non conorta·ls sieus,
		venir l'en pot tals mescaps e tals danz
		qu'el fara pron, si·lrestaur'en des anz.
V		Reis n'Anfos, ia·ls crois marritz
		non crezatz,
	35	ni·ls feingnenz alegoratz,
		car amon dinz lur maizos
		mais bos vis e bos morseus,
		c'ab afan penre casteus,
		ciutatz, ni reinz, ni faire faitz prezantz;
	40	tan lur es cars legors e pretz soanz!
VI		Vai dir, sirventes noveus,
		celleis, cui sui miels que mieus,
		que·lbes, que·m fai, es a totz los prezanz
		enantimenz e als crois desenanz.