Branciforti, F.. Le rime di Bonifacio Calvo. Catania: Università di Catania. Biblioteca della Facoltà di Lettere e Filosofia, 1955

[CdT en procés d'incorporació]

Codi: 101,013 Autor: Bonifaci Calvo Gènere: Sirventes Número: XV

 

S'ieu d'ir'ai meinz que razos non aporta

I	1	S'ieu d'ir'ai meinz que razos non aporta
		e chantan mais co menz par l'uchaizos,
		qu'er a chantar m'es aiud'e socors,
		no se·n meravil hom, car mi conorta
	5	rics cors, qu'ades m'enanç' em bon esper,
		per qu'eu sui gais e cant senz tot temer,
		qu'eu non envei
		ric d'amor frei,
		ni·m fan paor
	10	galiador
		ni mal parlier
		d'autrui mestier;
		pero s'ieu d'ira fos del tot loingnatz,
		meils for'adreitz vas los gent enseingnatz.
II	15	Si m'atrai senz vas l'Ardit, que·m deporta
		tan gen que·m mou plus espertz que·il ioios,
		que no m'es grieus capteinz d'avols seingnors;
		anz sui aizitz, cant tenon via torta
		e quan del tot fan contra lur dever,
	20	car lur afars es miels per decazer
		ab vil derrei,
		qu'ab seguir lei,
		que bais folor
		e desonor.
	25	E s'ieu en mier
		mal, tant sobrier
		mi son estat mei seingnor, que·l pecatz
		merces mi sembl'e granz humelitatz.
III		E si lai venz m'enpeinh, ni fustz mi porta
	30	on es l'adreitz seingner francs amoros,
		en cui es finz pretz e vera valors,
		ben er del tot m'ira delid'e morta.
		E sapchas ben que grieu pot remaner,
		qu'eu non fassa tant que·l posca vezer,
	35	sol m 'o autrei
		cil, cui soplei
		e qu'eu azor
		per fin 'amor
		ab cor entier.
	40	E s'eu m'enquier
		per qe·m sui tant de lui vezer tardatz,
		respondre·m posc: per zo qu'a lui non platz.
IV		Car no·ill plai genz vils, ni·l fai ubrir porta,
		ni·l agrad'om savais, ni de sen blos,
	45	ni rics cobes, voill esser per lui sors
		e fors del greu destric, que desconorta
		mos benvolenz, o metr'a nonchaler
		tot zo que·m pot a cobrar pro tener;
		car ieu non crei,
	50	que i sian trei
		ni dui seignor,
		qu'ab gran sabor,
		ni voluntier
		tan platzentier
	55	ni tan pro sian, q'ab dreg fos honratz
		hom de valor, que per els fos amatz.
V		E si chai venz cel qu'a plena l'esporta
		d'avol gazaing, e sobra·ls paubres pros
		d'esser gent acuillitz mest los aussors
	60	e fai bobanz ab enseingna destorta,
		ges no me·n pac, car anc no·m poc plazer
		rics d'avol plai, ni lez del sieu aver,
		segon bon drei
		a hom adrei,
	65	qu'aver lauzor
		vol de valor;
		ja·l mal obrier
		ric menudier
		non caniaran capteing, ben o sapchatz,
	70	mentr'er pels bos lur avers ren prezatz.
VI		Qui que soplei
		fort, ni s'autrei
		a gran seingnor
		vueg de valor,
	75	per nuil mestier
		non l'am, ni·l quier,
		car cel, cui fail tot zo que mais mi platz,
		no·m pogra dar fieu, don ie·n fos pagatz.