Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori
* Bibliografia de l'edició
* Glossari

* Davantal
* Aparat crític
* Notes
* Traduccions

 

Anglade, Joseph. Les poésies de Peire Vidal. Paris: Librairie ancienne Honoré Champion, 1913

Codi: 364,009 Autor: Peire Vidal Gènere: Canso Número: IV

 

Bels amics cars, ven s'en vas vos estius

I 1 Bels amics cars, ven s'en vas vos estius,
    Qu'entorn Nadal vos tramet de sas flors,
    E veg febrier, qu'es ja tornatz Pascors
    E fug iverns que no·us es agradius.
  5 Doncs pos li temps son al vostre voler,
    Ben es caitius e ben vol dechazer
    Cel que no·us sap honrar e car tener.
     
II   Mas mi platz tan vostre rics senhorius,
    Que quant aug dir de vos bonas lauzors,
  10 Aissi m'es gaugz e deleitz e sabors,
    Com an l'auzel, quan s'alegron pels nius
    Del cortes temps que vezon aparer :
    E volh vos tan, bels amics cars, vezer,
    Qu'a penas posc sai mos olhs ener.
     
III 15 E quar si mes entre·ls gilos aurius
    Tans honratz plaitz ni tan rica valors,
    A nos cortes es trebalhs e dolors.
    Mas d'una ren no·s fassa nulhs esquius :
    Qu'entr'avols gens no pot bos pretz caber,
  20 Car als avols deu tostemps mal saber
    So que·l pro fan, per'quom no·s deu temer.
     
IV   Del vostre dan, amics, sui mout caitius,
    E quar no·m fai ma domna nulh socors
    E destrenh mi tan fort la su'amors,
  25 Qu'eu cug morir consiros e pensius.
    Mala l'amei, pos no·m deu escazer
    E pos no·m posc de mon dan estener ;
    Ar sui eu cel qu'en mi non ai poder.
     
V   E si'n paresc a las autras esquius,
  30 Tan volh sos bes e tan volh sas honors,
    Don no·m deu ges nozer sa grans ricors.
    Qu'anc pos m'ac tot, no fui vas leis antius,
    Enans l’am mais de bon cor e de ver,
    Que de re mais gaug entier non esper ;
  35 Grans peccatz es, si·m torn'en nonchaler.
     
VI   La grans valors e·l pretz nominatius
    E·l dous plazers qu'en leis amar es sors,
    Fo guerrejatz per malastrucs trachors,
    Mas pois remas lo mais crims e·l fals brius.
  40 Per que devetz nom de serors aver,
    Qu'ambas ensems vos fai Deus mais valer
    Mal grat d'aicels que·m fan mon cor doler.
     
VII   Na Vierna, tornar e remaner
    Volgra ves vos, si m'en dones lezer
  45 Mos Castiatz, mas trop se fai temer.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI