Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Codi: 005,001 Autor: Ademar de Rocaficha Gènere: Canso Número: II

 

Ges per freg ni per calor

I	1	Ges per freg ni per calor
		ni per pascor ni per fuelh
		non ai ioy, mais don mi suelh:
		de lieys que salvan s'onor
	5	a de totz grat e l'ampara,
		e no si tray ni·s esgara
		ves dezavinent folhor,
		ans li es salvatga e fera,
		per qu'ieu mas iuntas li·m ren
	10	quar anc nulh galiamen
		no fetz ni·s pesset enquera.
II		A per pauc, quar no·m secorr,
		d'amor e de mi no·m tuelh,
		quar si·s dolgues com ie·m duelh,
	15	fora·m plus leu sufridor
		tug l'afan que no son ara;
		be·m par que no·m es amara,
		ans m'a tan doussa sabor
		qu'ab un plazer m'en lauzera,
	20	ue·m fezes seguentre cen
		enuegz, part lo pessamen,
		e ia de lieys no·m clamera.
III		Cauzit ai en la melhor
		que dompneya ni acuelh,
	25	e prec li no·m mostr'erguelh
		ni guart vas mi sa ricor,
		ni no li sia trop cara
		merces, que no·y fon encara
		pos mi ac per servidor;
	30	quar ben sap qu'ieu non nasquera
		mas per far son mandamen,
		per que· sieu bon chauzimen
		segray, si mal o bon mera.
IV		Mielhs de dompna e mielhs d'amor,
	35	mielhs de tot quan pus dir vuelh,
		e mielhs d'autra que·ys despuelh,
		mielhs de plazer d'amador,
		mielhs dels bes qu'om ve ni gara,
		mielhs etz de totz vos ara
	40	e mielhs de fina lauzor,
		quar totz mielhs en vos s'esmera,
		mielhs de pretz, mielhs de ioven,
		mielhs de beutat, mielhs de sen,
		s'um pauc de merce hi era.
V	45	Si las lagremas qu'ieu plor
		visson cazer li vostr' uelh
		ni vissetz, dona, cum muelh
		de l'aigua chauda que·m corr
		per la boca e per la cara,
	50	no cug fossetz tan avara
		non accetz qualque dolor
		al cor, que merce·us toquera,
		don fora·m pueis tan iauzen
		que per autr' esbaudimen
	55	negun mon ioi non camiera.
VI		Ni fin'amors no pauzera
		en dos cors, mon escien,
		tro de dos feses un gen
		amors, que lonc temps hi era.