Anglade, Joseph. Poésies du troubadour Peire Raimon de Toulose . Toulouse: E. Privat, 1920

Codi: 355,005 Autor: Peire Raimon de Tolosa Gènere: Canso Número: [IV]

 

Atressi com la candela

I	1	Atressi com la candela
		Que si meteissa destrui
		Per far clartat ad autrui,
		Chant, on plus trac greu martire
	5	Per plazer de l'autra gen.
		E car a dreit escien
		Sai qu'eu fatz folatge,
		C'ad autrui don alegratge
		Et a mi pen'e tormen,
	10	Nulha res, si mal m'en pren,
		No·m deu planher del damnatge.
II		Car ben conosc per uzatge
		Que lai on Amors s'aten
		Val foudatz en loc de sen.
	15	Doncs pos tant am e dezire
		La gensor qu'el mon se mir
		Per mal que·m deia venir
		No·s tanh que·m recreia;
		Car on plus m'auci d'enveia,
	20	Plus li dei ma mort grazir,
		Si·l dreit d'amor voill seguir,
		Qu'estiers sa cortz non plaideia.
III		Doncs pos aisso que·m guerreia
		Conosc que m'er a blandir,
	25	Ab honrar et ab servir
		Li serai hom e servire;
		E s'assi·m vol retener,
		Vec me tot al seu plazer,
		Fin, franc, ses bauzia.
	30	E s'ab aital tricharia
		Posc en sa cort remaner,
		El mon non a nulh saber
		Per qu'eu camjes ma volia.
IV		Lo jorn que sa cortezia
	35	Mi mostret e·m fetz parer
		Ab un amoros plazer
		Que·m fetz me cujet aucire:
		Qu'ins el cor m'anet sazir,
		E'l cor mi mes un dezir
	40	Que m'auci d'enveia;
		Et eu, com fols que foleia,
		Fui leus ad enfoletir,
		Car cujei so per albir
		Qu'eu eis no·m pens qu'esser deia.
V	45	Si per nulh'autra que seia
		Mi pogues plus enriqui,
		Be·m n'agra'a cor a partir;
		Mas com plus fort m'o consire,
		En tant quan lo mons perpren,
	50	Non sai una tant valen
		De negun paratge;
		Per qu'eu el seu senhoratge
		Remanh tot vencudament,
		Pos non trob melhurament
	55	Per fors'o per agradatge.
VI		Cansos, al port d'alegratge
		On Pretz e Valors s'aten,
		Al Rei que sap et enten,
		M'iras en Arago dire
	60	C'anc mais tant jauzens non fui
		Per fin'amor com er sui;
		C'ab rems et ab vela
		Poj'ades so que no·s cela;
		E per so non fatz gran brui
	65	Ni volh c'om sapcha de cui
		M'o dic, plus que d'un'estela.
VII		Mas von am, ges un'amel
		No·m prez, car ab vos non sui.
		Pero als ops vos estrui
	70	Que·m siatz governs e vela.