Anglade, Joseph. Poésies du troubadour Peire Raimon de Toulose . Toulouse: E. Privat, 1920

Codi: 355,007 Autor: Peire Raimon de Tolosa Gènere: Canso Número: [VI]

 

Enquera·m vai recalivan

I	1	Enquera·m vai recalivan
		Lo mals d'amor qu'avi'antan;
		Qu'una dolor mi sent venir
		Al cor d'un angoyssos talan,
	5	E·l metges que·m pogra guerir
		Vol me traitura tenir,
		Aissi cum l'autre metge fan.
II		E pogra·m guerir ses afan,
		Que ja non traysses pauc ni gran;
	10	Pero sitot mi fai languir,
		En re no·lf port pejor talan;
		Mas si m'alongues de morir,
		Ma vida for'al sieu servir,
		E ma mort conosc a son dan.
III	15	E ja no·m desesper per tan,
		Qu'anc de re non passei son man,
		Ni·m vuelf per nulh autre dezir;
		De so gart que·lh n'er benestan;
		Qu'Ipocras, so ai auzit dir,
	20	Ditz que metges non deu fallir
		De nulh cosselh qu'om li deman.
IV		Doncx, pus pres ma en son coman,
		Ja no m'anes plus languian,
		Ni no·m volgues del tot aucir;
	25	Quar no·s cug, si be·m ri ni·m chan,
		Qu'o puesca longamen sufrir;
		Ni no·s poira tostemps cubrir
		La dolor qu'ins el cor s'espan.
V		Mas ieu atendray merceyan,
	30	Sirven e sufren e preyan,
		Tro que denh mos precx eyssauzir;
		Mas d'una ren vauc trop doptan,
		Si·m fai trop dieta tenir;
		Si·m sen lo cor afrevolir
	35	Que paor ai l'arma s'en an.
VI		Mas si·m fezes un bel semblan
		Que m'anes mon cor adoussan,
		Enquer cugera revenir;
		Quar s'ieu muer, colpa n'aura gran;
	40	Per so deu guardar e chauzir.
		E s'en cor m'a pro a tenir,
		Per Dieu no m'o anes tarzan.
VII		Que·l febles cors vai sospiran,
		Quar conois qu'ieu mezeis m'engan,
	45	E·m vey tot dia magrezir;
		Aizzi·m va·l cor e·l sens camjan,
		Com si l'arm'en devi'issir;
		Tan fort m'anguoysson li sospir,
		Qu'a pauc tro al derrier no·m van.
VIII	50	E Mon Ereubut prec e man
		Qu'a la pro Comtessa prezan
		Fassa ma chansonet'auzir;
		E si a nul mot malestan,
		No m'o deu hom a mal tenir:
	55	Que tant ai d'ira e de cossir
		Que re no sai que·m vau parlan.