Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Codi: 047,007 Autor: Berenguier de Palazol Gènere: Canso Número: VIII

 

Dona, si totz temps vivia

I	1	Dona, si totz temps vivia,
		totz temps vos serai aclis;
		estranhamen m'abelhis
		qu'ie·us am, quals que dans me·n sia
	5	destinatz ni a venir;
		si tot no me·n puesc iauzir
		tan bė cum mos cors volria,
		si·n val mais mos pessamens
		e me·n sap melhor iovens
	10	e deportz e guallardia.
II		Per dieu, belha douss'amia,
		per cuy aflam e languis,
		enaisi m'avetz conquis
		qu'altre iauzir no·m plairia.
	15	si tot m'assagiey mentir
		per tal que pogues cobrir
		la sobramor qu'ie·us avia,
		anc iorn no·s camget mos sens
		de vos amar finamens,
	20	ni poderos no·n seria.
III		Molt vuelh vostra senhoria,
		mais que d'altra que anc vis;
		e·l vostre cors francx e fis,
		genser qu'ieu dir no sabria,
	25	fa mi d'enveya murir,
		quar plus soven no·us remir;
		tan es de bella paria,
		cueind'e agradiva e plazens:
		totz autre ioys es niens
	30	encontra qui vos iauzia.
IV		Anc no cuydiey en tal via
		intrar don ia non issis,
		pero tan cochos m'i mis,
		qu'anc non gardiey on iria.
	35	e doncx, dona cuy dezir,
		pus a cap no puesc yssir
		de so que ieu tan volria,
		quals er mos captenemens?
		que sai, on prumeiramens
	40	intrey, me truep tota via.
V		Ja·l sens ni la cortezia
		ni·l bel semblan ni·l dous ris
		qui m'estan al cor assis,
		. . . . . . . . . . . . . . . .
	45	no·m degron tant abelir,
		si no·m denhatz cossentir,
		ans que·l deziriers m'aucia,
		que·m sobrapoder' e·m vens,
		que·l vostre ricx cors valens
	50	restaur ab sen ma folia.
VI		Foldatz es e leuiaria
		quar part vostres mandamens
		vos am, pero nulhs sens
		ma foldat no·m camiaria.