Anglade, Joseph. Poésies du troubadour Peire Raimon de Toulose . Toulouse: E. Privat, 1920

Codi: 355,017 Autor: Peire Raimon de Tolosa Gènere: Canso Número: [XV]

 

Si com l'enfans qu'es alevatz petitz

I	1	Si com l'enfans qu'es alevatz petitz
		En cort valen et honratz del seignor,
		Pois, quant es grantz, se·n part e quer meillor,
		No·l pot trobar, ten se per escarnitz,
	5	Vol s'en tornar, non a tant d'ardiment,
		Aitals son eu, que·m parti follamen
		Da lleis, cui ren merces, se·m vol sofrir,
		Que venjamen en prend'; al no desir.
II		Venjar s'en pot de mi, qu'er'afollitz.
	10	Mais hom qu'es fols, cho dizon li autor,
		Non er jutjatz, tan que·l ten be iror,
		Del mal qu'il fai, ni per raison punitz;
		Mas quant n'er for, es jujatz, s'il mespren,
		O s'il avia enanz fait faillimen.
	15	E se·l fis anc, ben vos dic ses mentir,
		Il sap lo ver, fassa·m totz temps languir.
III		Ben o pot far e totz sera graziztz
		Lo mals; l'afan, la pena e la dolor
		Suffr'eu en pais, e semblara·m doussor;
	20	Mais il gart sei, qu'al seu bon pretz floritz
		Ges non eschai ni non es avinen
		De totz mals faitz qu'il prenda venjamen;
		Mais val perdos e mielz fai a grazir,
		E sel qui·l prent en val mais per servir.
IV	25	Eu valgra mais per servir; e garitz
		M'agra merces, pietatz et amor,
		S'omilies midons sa grant ricor
		Qu'il mandes chai saluz e breu escritz;
		E sui trop fols, quant ai tal pensamen
	30	Qu'ill mandes chai man; sofra·n solamen
		...Ver leis mains jonchas obezir
		Tot son coman, si·l platz viure o morir.
V		Per son coman no fo mortz ni traïts
	35	...............................
		.......Que·m parti de la flor
		De tot lo mon, que m'avia noiritz.
		Puois me·n parti, fui en tal marrimen
		Don fora mortz, si no fos jauzimen
	40	Q'atent merce, per cho qu'al departir
		Me dis ploran: «Deus te lais revenir!»