Anglade, Joseph. Poésies du troubadour Peire Raimon de Toulose . Toulouse: E. Privat, 1920

Codi: 355,020 Autor: Peire Raimon de Tolosa Gènere: Canso Número: [XVIII]

 

Us novels pessamens m'estai

I	1	Us novels pessamens m'estai
		Al cor, per qu'eu n'ay greu cossir,
		Don fas mant angoissos sospir;
		E n'ai soven mon cor plus guay,
	5	E·m gart miels de far desplazer,
		E m'esfors en ben captener,
		Quan vey que n'es luecx e sazos;
		E slh qu'a son poder es bos,
		Ben deu aver mais d'onransa.
II	10	Onramens grans cre que·l n'eschai
		A celh que sap en patz sufrir
		Son dan, o belhamen cubrir,
		Mantas vetz, so qu'al cor no·l play;
		Et qui sobr'ira·s sap tener
	15	De far e de dir non dever,
		Ges non s'en merma sa razos;
		Per qu'om non deu esser coytos
		De far gran desmezuransa.
III		Desmezura conosc hueymai
	20	Que fai ma dona, ses mentir,
		Pus que a se·m fetz aissi venir,
		E so que·m promes er m'estray;
		Que qui non a vezat aver
		Gran be, plus leu sap sostener
	25	Afans, que tals es belhs e bos,
		Que·l maltraitz l'es plus angoissos,
		Quan li sove·l benanansa.
IV		Benanans'e fin joi verai
		Aic ieu de midons al partir.
	30	Partiz non suy, per qu'ieu m'azir,
		Quar a mos precs braus respos fay,
		Denan sos pes l'irai cazer,
		S'a lieys platz que denhe voler
		Que de lieys fassa chansos,
	35	Quar de me no suy poderos
		Qu'en autra paus m'esperansa,
V		Ben esper, per l'afan que n'ai,
		Que·m vuelha midons mantenir,
		Que non es autr', al mieu albir,
	40	Ni fon tan belha, sotz lo ray.
		Sopleian quier que·m denh valer;
		Qu'ieu conosc, segon mon saber,
		Qu'ab los melhors se fai hom bos;
		Et es assatz belha razos
	45	Aver joy de fin'amansa.
VI		Mans jointas e de genolhos
		Mi rent a vos qu'etz bel'e pros,
		Domna de gaia semblansa.