Almqvist, Kurt. Poésies du troubadour Guilhem Adémar. Uppsala: Almqvist &Wiksells Boktryckeri, 1951

[CdT en procés d'incorporació]

Codi: 202,002 Autor: Guilhem Ademar Gènere: Canso Número: VI

 

Ben agr'ops q'ieu saubes faire

I	1	Ben agr'ops q'ieu saubes faire
		Tal breu chansson a la festa
		Don chascus en alta testa
		En esdevengues cantaire;
	5	Que chanssos en cortz et en plais
		Las plus apresas prez'om mais.
		Per q'ieu de ma longa razo
		Mourai a mesura del so.
II		Pro·n puosc laissar e retraire,
	10	Que mais n'i a que de gesta;
		C'assatz pareis a la testa
		Cum sui pauc amatz amaire,
		Que ja·n sui esdevengutz sais
		Per midonz d'ir'e de pantais.
	15	C'anc non auzi, fors de Breto,
		D'om en tant long'atendezo.
III		Mas era m'en vuoill estraire,
		Que trop n'ai faich long'enquesta;
		E sil - salve Dieus sa testa! -
	20	Fassa·m de sa carta raire!
		Q'ieu non vuoill plus portar lo fais,
		Fassa·l autrui tirar! Q'ieu·l lais.
		Non per tan que pros dompna fo,
		E si er'ad ops de maiso.
IV	25	Q'ieu sui de tal enquistaire
		- C'ai d'entre cen bell'elesta -
		Q'es, per esta mia testa,
		De totas cen la bellaire.
		Et es tant rics sos pretz verais,
	30	Si ja Dieus mi don q'ieu la bais,
		Eu l'am mais servir en perdo
		Que nuill'autr' ab rie guizerdo.
V		E car es tant de bon aire,
		Franc'et humils et honesta,
	35	L'am euro los huoills de ma testa,
		E car non a talan vaire;
		Tant es cortesa senes ais
		C'anc ren non galïet ni trais
		Ni fetz enoi ni mespreiso
	40	Don ja savis hom l'ochaiso.
VI		Mais vuoill esser mercejaire
		De lieis c'autr'aver conquesta.
		C'aissi·m montet en la testa
		L'amors, qand a son repaire
	45	Mi preguet q'enves lieis m'apais
		E·m fass'entre sos vezis gais,
		C'ab pauc del tot remas no·i so,
		Casatz d'ort e de bastizo.
VII		Messatgiers, vai de grans eslais
	50	A Narbon'en l'aussor palais!
		Mi portaras esta cansso
		A la meillor dompna c'anc fo,
VIII		E pois d'aqui a Tarasco,
		A mon Envejos bel e bo.