Almqvist, Kurt. Poésies du troubadour Guilhem Adémar. Uppsala: Almqvist &Wiksells Boktryckeri, 1951

[CdT en procés d'incorporació]

Codi: 202,009 Autor: Guilhem Ademar Gènere: Canso Número: VII

 

 Non pot esser sofert ni atendut

I	1	Non pot esser sofert ni atendut
		C'ades non chan pois l'estiu vei tornat;
		E li vergier, cum s'ill eron canut,
		Pareisson blanc, e verdejon li prat.
	5	Adoncs m'a si conquistat un'amors,
		Sol pel respieich d'un covinen qe·m fe,
		- Gardatz que feira sij agues del faich re! -
		C'a penas deing ab autr'aver solatz.
II		A sos ops m'a de bon cor retengut
	10	Cella qe m'a per amic conquistat;
		Assatz m'a mieils en breu temps conogut
		Que tals hi ai lonc termini poignat.
		C'us reproviers me ditz dels ancessors:
		« Qui temps esper'e no fai qan temps ve,
	15	Si temps li faill, ben estai e cove »;
		Que loncs espers a mains faitz destorbatz.
III		Ab aisso m'a joi e deport rendut
		E mon saber esders e meillurat,
		Q'en aquest mot cuig aver entendut
	20	Qe·m vol en breu far ric de s'amistat.
		A so conosc ben dels lausengadors
		- Qan mi cuideron mal far, m'ant faich be -;
		E grazisc lor de na Mala-merce,
		c'ar sui de lieis estortz et escapatz.
IV	25	E vitz anc mais son par plait avengut
		Ad home viu? Aujatz cum es anat!
		C'a doble m'ant miei enemic valgut
		Que no feiron si m'agesson amat.
		E vitz anc mais enaissi valedors?
	30	Q'ieu lor vuoill mal de mort et ill a me,
		Pero traich m'ant de tal luoc on jasse
		Sofrir'affan e fora perillatz.
V		Mas eras ai a bon port de salut,
		Fe qe vos dei, mon navei aribat
	35	Et ai lo plom e l'estaing recrezut
		E per fin aur mon argen cambïat;
		C'autrejat m'a una de las gensors.
		Dompnas del mon - e jes no·m descove -
		Qe·m des s'amor e d'un baisar m'estre;
	40	Et es tant pros c'us reis i for'honratz.
VI		E per aisso mi teing per ereubut
		E non envej el mon nuill home nat,
		Si·m vol midonz tener vestit o nut
		Un ser lonc se en luoc de moillerat.
	45	Anc no fon faig al mieu par tals honors
		Cum a mi er, si·naissi s'esdeve
		Qe·l sieu blanc cors gras, escafit e le
		Remir baisan ni teng'entre mos bratz.
VII		Si·l reis n' Amfos, cui dopton li Masmut,
	50	E·l mieiller coms de la crestïantat
		Mandavon ost - puois ben son remasut -
		E nom de Dieu, farion gran bontat
		Sobre·ls pagans sarrazins traïtors,
		Ab qe l'us d'els menes ensems ab se
	55	Marit seignor qi·nclau e ser'e te;
		Non ant pechat no lor fos perdonatz.
VIII		Eu remanrai e non irai aillors
		Ni virarai en altra part mon fre;
		E ja neguns no·m demandetz per que!
	60	Que ja per vos non serai decelatz.