Almqvist, Kurt. Poésies du troubadour Guilhem Adémar. Uppsala: Almqvist &Wiksells Boktryckeri, 1951

[CdT en procés d'incorporació]

Codi: 202,005 Autor: Guilhem Ademar Gènere: Canso Número: VIII

 

 De ben gran joia chantera

I	1	De ben gran joia chantera,
		S'ieu agues razon de que;
		Mas d'amor no·m lau de re
		Ni blasmar no·m n'ausaria,
	5	Tant dopti ma douss'amia.
		E doncs, de que chantarai,
		Pois mal ni be no·n dirai?
II		Per Crist! Non o sai enqera,
		Si razos no·is n'esdeve;
	10	Que clams no·m n'estai jes be;
		Lauzar? - Cum m'en lauzaria,
		S'ila·l per que no·m fazia?
		Dir o puosc ieu, mas ben sai
		Que nuill pro d'amar non ai.
III	15	Anceis m'es esquiv'e fera,
		On ieu plus li clam merce.
		E sai ben per qe·is n'abste
		Mos cors (-que non di foillia):
		Que meins val us ans d'un dia.
	20	Per qe·m sui mes en assai
		Si ja·l bon jorn trobarai.
IV		E ja no m'en penedera,
		S'Amors non fos tant ab me.
		E doncs, car non tir mon fre?
	25	Que fols es qui no·is chastia. -
		Oimais qe·m chastïaria?
		Que tot morrai o l'aurai,
		Que ja no m'en partirai.
V		Car a totz dias s' esmera
	30	Cella qe·m reten ab se.
		Et ella de qe·m rete? -
		Mas de sa bella paria! -
		O ill; mas plus en volria,
		No·n ai pro. - E qe·n vuoill mai?
	35	Mas pos bel semblan mi fai!
VI		Dieu prec e Sainta Maria,
		On que na Bïatriz sia
		De Narbona, qe·il don jai
		E·ill cresca son pretz verai.