Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Codi: 069,003 Autor: Bernart de Tot lo mon Gènere: Sirventes Número: XXII

 

Mals fregz s'es els ricx croys mes

I	1	Mals fregz s'es els ricx croys mes;
		ricx homes de tals en say,
		qu·ilh an freg, on plus chaut fay
		quecx son croy cor descortes,
	5	re no fan que ben estia; — —
		et yeu suy gays nueg e dia,
		fis, sapchatz, leyals amicx
		amatz, don me tenh per ricx,
		quar midons platz qu’ieu sieus sia.
II	10	Dirie·us qual son? — ieu non ges. —
		e per que m’en layssaray? —
		per que mal dire·m desplay. —
		mal dir no seria ges,
		so’m esmendar se·n podia. — —
	15	bem belh dig m’a dig m’amia,
		que de re no sia enicx,
		qu’elha m’er tostemps abricx
		en tot so que s’onors sia.
III		Cum pot esser ni cum es,
	20	que nulhs bes-far no lor play?
		ben gran meravilha n’ay,
		quar grans meravilla es; —
		non es ges, qui·ls conoyssia; — —
		pur yeu suy guays, cum que sia,
	25	malgrat dels malvatz mendicx,
		quan be·m pesse, que mos picx
		picara, cuy que greu sia.
IV		Quad’an an freg· XII· mes
		ab tot so qu’als mes s’eschai,
	30	e son freg d’ivern en mai
		lor frech fragh fach descortes,
		que fan ab descortezia; — —
		yeu suy d'amor en la via,
		qu'amors no m'es enemicx
	35	ni fals lauzengiers destricx,
		ans am mielhs que no solia.
V		Miegz fregz er lo sirventes,
		quant er faitz, que ben o say;
		qu'ilh an freg, e freg no fay,
	40	fregz los acor, que·ls te pres,
		en tal guia que·ls aucia; — —
		mé don dieus so qu'ieu volria
		de lieys, on no chal chasticx;
		ben aia·l pros coms n'Enricx,
	45	qu'elh viu gays ab cortezia.
VI		Freg so, e fregz los aucia,
		que, quar vivon, es fasticx; — —
		dompna, ye·us sui fis amicx
		e serey tan quan vius sia.
VII	50	Per donzelas serai ricx,
		que no·m triga, quant que sia.