Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Codi: 282,007 Autor: Lanfranc Cigala Gènere: Planh Número: LXXXI

 

Eu non chant ges per talan de chantar

I	1	Eu non chant ges per talan de chantar. —
		mas si chant eu? — non chant, mas chantan plor,
		per c 'aital chan deu hom clamar chan-plor,
		car es mesclatz lo chanz ab lo plorar;
	5	e no·n dig'om que aia fait faillensa
		d'aital mesclar, car so que dic ploran
		non poiri' hom soffrir d'auzir ses chan,
		tant es mortals la perd' e·ill meschaenza.
II		Car morta es cella qu'era ses par
	10	de pretz prezat e de valen valor,
		de cortes ditz e de faitz e d'onor,
		d'enseingnamen, d'acuillir e d'onrar,
		na Berlenda, domna de conoissenza,
		per cui devon plorar li pauc e·ill gran,
	15	car il era de tot fait benestan
		cim' e raditz, flors e frutz e semensa.
III		Mort es tot zo qu'el mon era de car,
		e zo per qe valion li meillor,
		e zo per que chantavon chantador,
	20	e zo per que prezavon domneiar,
		e zo per que valia neis valensa,
		e zo per que estava autr'enan;
		plor doncs cascuns, que passat son mil an
		que mort no fes tan gran desconoissenza.
IV	25	Om non la vi ni non l'auzi nomnar,
		qe non la fes sa domn' e son seingnor,
		car fazia ab gaug et ab douzor
		los crois valer e·ls valens afinar.
		e doncs per que no mor tota·il proenza
	30	ont il mori, e tuit cil que i istan?
		c'oimais en dol et en consir viuran, e zo li er pieg de mort, a ma parvenza.
		c'oimais en dol et en consir viuran,
		e zo li er pieg de mort, a ma parvenza.
V		Pero sivals hom non la pot comtar
		. . . son ops mas a nostra dolor,
	35	car un comtatz non l'era pron d'onor,
		per que lla vol dieus en cel far regnar;
		e si tot sai en reman dechaenza,
		li saint angel la·n portaran chantan;
		per son profeg, si tot nos torn' a dan,
	40	no·s deu adur de plorar estendenza.
VI		Luresana, pensatz de penedensa,
		que dieus vos vol confondre derenan,
		e pareis ben al sobremortal dan
		c'aves äut, que vostra mortz comensa.