Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Codi: 102,001 Autor: Bonifaci de Castellana Gènere: Sirventes Número: XXXVII

 

Era, pueis yverns es e·l fil

I	1	Era, pueis yverns es e·l fil
		qe d'aiga·s glason, mais de mil,
		ai cor de far un sirventes;
		e s'ieu i met negun mot vil,
		no me·n çhal, qar dels malpares
		baros qu'ieu trueb ples de no-fes,
		chantarai, qe dieus los acor!
II		D'els e de lur façh hai mal-cor,
		qar eilh non han valor ni cor,
	10	e trueb los vas prez trop estrils;
		mal resenblan al pro n'Ector,
		per que·n volgra ausir ses qils
		q'om lur tolges entro als fils
		ço pauc qe lur es remansut.
III	15	Lo rei engles cug q'a·l sanglut,
		qar tan lo ve hom estar mut
		de demandar sas eretatz;
		e mentr' est autr' han tan perdut,
		degra si menar daus totz latz
	20	coredors e cavals armatz,
		tro cobres sas possessios.
IV		E·l flacs reis cui es Aragos,
		fatot l'an plag a man gasos,
		e fora·ilh plus bel, so m'es vis,
	25	qe demandes am sos baros
		son paire, q'era pros e fis,
		qi fon mortz entre sos vesis,
		tro fos dos tantz aqitiat.
V		E li fals clerge renegat
	30	cuidan deseretar Colrat
		per donar a lor bastardos,
		e tenon l'emperi vacat
		ab las lur malvaisas lesos,
		don cuian reinhar entre nos;
	35	mas San Peir han trop irascut.
VI		De mon seinhor, si dieus m'ajut,
		se no creses conseilh menut,
		sai q'el fora adrechz e bos,
		e plagran li brant e escut,
	40	elm eausberg e garnisos;
		e fora ben dreitz e rasos,
		q'enaissi·s tainh d'enamorat.
VII		Arbalestier be aresat
		e cavalier, qan van rengat,
	45	mi plason trop mais qe libel;
		e ia no·m trobares lasat
		q'ieu non fas' asaut e cenbel
		e non abraz sout son mantel
		donna ab gras cor e delgat.
VIII	50	Mauret, una·m det son anel,
		de q'ie·us trobei trop airat.
IX		Tramet a vos e en Sordell
		mon sirventes, q'ei acabat.