Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Codi: 202,011 Autor: Guilhem Ademar Gènere: Canso Número: LIII

 

Quan la bruna biza branda

I	1	Quan la bruna biza branda
		de la forest fraysses e faus,
		e secha·l ioncx e·l glais e·l raus,
		e la lauzet'en la landa
	5	a son dous chantar retengut,
		adoncx ai ieu lo mieu cregut,
		quar suy mais que no suelh, prezans
		e·m vai mielhs que no sol, dos tans.
II		Que tals mi tramet e·m manda
	10	salutz et amistatz coraus
		dont ieu no sai tan dir de laus,
		sa valors no fos plus granda;
		ben ai proat e conogut
		del sieu cors gent aperceubut
	15	que non a par de belhs semblans
		en tot lo mon, si ben s'es grans.
III		Per so m'escalf' e m'abranda
		sa fina amistatz coraus;
		quan non la vey, no fi ni paus,
	20	qu'ans ses orguelh e ses guanda
		vauc ves lieys a for d'esperdut;
		e des que la vey, no·m remut,
		tro qu'es denan mi trespassans;
		pueyssas, on plus puesc, lai m'enans.
IV	25	Dieus li fes richa comanda
		lo iorn que·l comandet las claus
		de lai on es pretz chabaus,
		e volc qu'en moutz luecx l'espanda;
		si fa ylh be, si dieus m'aiut,
	30	et ieu, si tan no fos crezut,
		fauc lo creire als plus duptans
		et als plus parliers plaideyans.
V		Elh eyss dieus que·l mon guaranda,
		la fetz, e fon ricx lo iornaus;
	35	e quan l'ac facha, dis: „aitaus
		vuelh que la serv' e la blanda
		totz temps, e per ren no se·n mut.“
		de me o dis, ben es sauput,
		per que, si·lh servia mil ans,
	40	lo maltragz no·m seri' afans.
VI		Ben leu manhta gens truanda
		dizon, quar no sabon ren aus,
		quar es fina e naturaus,
		qu'aisso dic de na Bertranda;
	45	mas non an tan cum ieu vegut
		ni no lai son tan luenh avut.
		qui que la·s volgues, fos Bertrans,
		sol qu'ieu fos rics de ric-aimans. —
VII		Egual si semblon a randa. —
	50	una de lieys par ni eguaus?
		quo fai l'aiglos de coa·l paus
		ni del cap lombers miranda;
		et ieu ses lansa e ses escut
		rendria·n tot home vencut
	55	qui d'aisso m'estes contrastans,
		guarnit del tot, no·n fos menhs guans.
VIII		Narbona, on qu'ieu si' anans,
		lai volf e vir'e vai mos chans.