Cluzel, Irénée. Princes et troubadours de la maison royale de Barcelone-Aragon. "Boletín de la Real Academia de Buenas Letras de Barcelona", 27 (1957-1958), pp. 321-373.

Codi: 023,001 Autor: Anfos Gènere: Canso Número: I, 1

 

Per manhtas guizas m'es datz

I	1	Per manhtas guizas m'es datz
		joys e deportz e solatz,
		que per vergiers e per pratz,
		e per foillas e per flors,
	5	e pel temps qu'es refrescatz,
		aug alegrar chantadors;
		mas al mieu chan neus ni glatz
		no·m notz, ni m'ajud'estatz
		ni re, for Dieu et Amors.
II	10	E pero ges no·m desplatz
		lo belh temps ni la clardatz,
		ni·l dous chans qu'aug pels playssatz
		dels auzelhs, ni la verdors,
		qu'ayssi·m suy ab joy lassatz
	15	ab una de las melhors :
		en lieys es sens e beutatz,
		per qu'ieu li do tot quan fatz,
		e joys e pretz et honors.
III		En trop ricas voluntatz
	20	s'es mos cors ab joy mesclatz!
		Mas no sai si s'es foudatz
		o ardimens o paors,
		o grans sens amezuratz,
		o si s'es astre d'Amors,
	25	qu'anc, de l'hora qu'ieu suy natz,
		mays no·m destreys amistatz
		ni·m senti mals ni dolors.
IV		Tan mi destrenh sa bontatz
		sa proez'e sa beutatz
	30	qu'ieu n'am mais sofrir em patz
		penas e dans e dolors
		que d'autra, jauzens amatz,
		grans bes faitz e grans secors;
		sos homs plevitz e juratz
	35	serai ades, s'a lieys platz,
		davan totz autres senhors.
V		Quan mi membra dels comjatz
		que pris de lieys, totz forsatz,
		alegres suy et iratz,
	40	qu'ab sospirs mesclatz de plors
		me dis : « Belhs amicx, tornatz,
		« per merce, vas me de cors! »
		Per qu'ieu tornaray viatz
		vas lieys, quar autr'embayssatz
	45	no m'es delietz ni sabors.