Cluzel, Irénée. Princes et troubadours de la maison royale de Barcelone-Aragon. "Boletín de la Real Academia de Buenas Letras de Barcelona", 27 (1957-1958), pp. 321-373.

Codi: 424,001=393,001 Autor: Rodrigo, Lo Coms de Proensa Gènere: Tenso (Partimen) Número: II, 5

 

Ar chauçes de cavalaria

I	1	Ar chauçes de cavalaria,	[Raimons]
		En Rodrigos, lo laus e·l pres,
		e·l retenes per tota via,
		ses l'obra; — e si mais voles
	5	l'obra, no·i sia
		le pres nul dia
		ni·l laus; mas pero tal prendes
		qe vostr'amia
		totz temps n'estia
	10	vostra; — sino, er la perdes !
II		Laus mensongiers es juglaria,	[Rodrigo]
		Raimons, per qe saber podes
		qe non m'azaut de sa paria:
		e vueilh l'obra aver ades
	15	en ma bailhia,
		qar, a bauçia,
		non es dretz Midons gazainhes,
		tan s'umelia
		en leis coindia,
	20	per q'ab frau non tainh q'eu l'ames.
III		En Rodrigos, s'aiso·us ajuda	[Raimons]
		az aver pi de leis q'amatz,
		dezastre·us ha joia creguda !
		Mas, s'ill es tals con nos la faz,
	25	ja no·us er druda
		ni car tenguda,
		qar laus e pres per ren laissatz:
		don ilh si muda
		qan venra·l bruda
	30	e·l laus dels cavalhiers prezats.
IV		Vostra raços mi par vencuda,	[Rodrigo]
		Raimons, qar non ver razonatz
		ab faz d'armas, don mantenguda
		es valors e jois e solatz,
	35	e qar no·s muda
		per gen menuda
		ma domna, cui sui obligatz,
		qar folla cuda
		non es volguda
	40	per leis, tan la sosten vertatz.
V		En Rodrigos, sobregrazida	[Raimons]
		nos es; fins jois vos er faiditz,
		e vostra domna·us er faidida,
		pos non seres per nul grazitz,
	45	c'obra perida
		es, e s'oblida
		ses laus e ses prez, qi·lh es gitz.
		Laus e prez gida
		fin joi a vida,
	50	per q'es vencutz e relenqitz.
VI		De cell s'es vergoinha partida	[Rodrigo]
		qe vol esser qar ha mentitz,
		Raimons, per q'ieu hai, ses failhida,
		l'obra, on es totz bes noiritz,
	55	per miells chauçida,
		qar ges aizida
		non es drez qe·m fos, per fals ditz,
		cil q'es complida,
		sol foz ardida
	60	d'amar, de totz bos aibs co[m]plitz.
VII		— Pos la partida	[Raimons]
		avem bastida,
		En Gigo juge nostres ditz !
VIII		— Be·m platz qar gida	[Rodrigo]
	65	valor complida,
		En Berengier, ni m'abellitz.