Audiau, Jean. Les poésies des quatre troubadours d'Ussel, publiées d'après les manuscrits. Paris: Librarie Delagrave, 1922.

Codi: 194,019 Autor: Gui d'Ussel Gènere: Canso Número: II

 

Si be·m partetz, mala dompna, de vos

I	1	Si be·m partetz, mala dompna, de vos,
		Non es razos q’ieu me parta de chan
		Ni de solatz, car faria semblan
		Que fos iratz de so don sui joios.
	5	Ben fui iratz, mas eras m’en repen,
		Car apres ai del vostr’enseignamen
		Cum puosca leu camjar ma voluntat ;
		Per q’eras chan de so don ai plorat.
II		Plorat n’ai ieu, e·l majer ochaizos
	10	Ven mi d’aital que no·s n’ira chantan
		C’a mi non es, sitot s’en vai gaban.
		Onta ni dans, ni lieis honors ni pros.
		Si be·m camjet per lui nesciamen,
		Lui camjara ben leu plus follamen
	15	Per q’ieu no·il sai d’aqest camje mal grat ;
		Qu’ill camjara tro c’aja·l cor camjat.
III		Mala dompna, ja non cujei que fos
		Que, si·us perdes, no m’o tengues a dan,
		Que l’acuillirs, don vos sabiatz tan,
	20	E·l gens parlars, e l’avinens respos
		Vos fazian sobre totas plazen ;
		Mas era·us tol foldatz l’aculimen,
		E·l gen parlar es tornat en ab barat,
		Et en breu temps vos perdretz la beltat.
IV	25	Mala dompna, faich m’avetz enojos,
		E mal dizen, don non agra talan,
		Q’ieu conosc ben c’a mal m’o tornaran
		E qe meins n’er prezada ma chanssos.
		Mas ieu aurai volgut tan longamen
	30	Vostre voler, don aras mi repen,
		C’aissi m’era de cor en us tornat :
		No sai dir sen que vos fassatz foldat.
V		Tant cum hom fai so que deu, es hom pros,
		Et tant leials cum se garda d’engan ;
	35	Per mi·us o dic que vos lauzav’antan,
		Qand era·l digz vertadiers e·l faitz bos.
		Ges per aisso no·m devetz dir q’ieu men
		Sitot eras non vos tenc per valen,
		Car qui laissa so q’a gen comenssat
	40	Non a bon pretz per aco q’es passat.
VI		Adreich fora, sitot non es razos,
		Que si dompna fezes ren malestan,
		C’om la·n celes, e·l ben traisses enan,
		Mas jes eras non es aitals sazos !
	45	Per qe·us devetz gardar de faillimen,
		A vos o dic, de totas o enten,
		Que si faitz mal, ja non sera celat,
		Anz en vol hom plus dire de vertat.
VII		Na Margarita, beutat e joven
	50	Avetz, e pretz e cortesi’ e sen ;
		E s’ai trop dich de l’autr’ a lei d’irat,
		De vos ai dich trop meins de la vertat.
VIII		Reis d’Aragon, dompnejan e meten,
		E conqueren, conqueretz pretz valen,
	55	E tenetz o si cum es comenssat ;
		Si non o faitz, perdut n’auretz lo grat.