Audiau, Jean. Les poésies des quatre troubadours d'Ussel, publiées d'après les manuscrits. Paris: Librarie Delagrave, 1922.

Codi: 194,015 Autor: Gui d'Ussel Gènere: Pastorela Número: X

 

L'autrier, cavalcava

I		L'autrier cavalcava
		Sus mon palafre,
		Ab clar temps sere,
		E vi denan me
	5	Una pastorella,
		Ab color fresqu'e novella,
		Que chantet mout gen,
		E disia en plaingnen :
		« Lassa ! mal viu qui pert son jauzimen ! »
II	10	Lai on il chantava
		Virei tost mon fre,
		Et il levet se,
		La soa merce,
		Vas mi mout isnela,
	15	La franca res bon' e bella,
		Et eu mantenen
		Desmontei per onramen
		De leis que·m fetz tan bel acuillimen.
III		— « Tosa de bon aire,
	20	Dis eu, ses temer
		Prec que·m digas ver,
		Si·us ven a plazer,
		Quegna chansos era
		Cella que disïatz era,
	25	Quant eu vinc aissi ;
		Quar anc mais, so vos afi,
		Tan ben chantar pastora non auzi ».
IV		— « Seigner, non a gaire
		Qu'eu soli'aver
	30	A tot mon voler
		Tal que·m fai doler,
		Car non l'ai enquera,
		Mas il m'oblid'e s'esfera,
		Per autra de mi;
	35	Per qu'eu planc ; et atressi
		Chan c'oblides la dolor que m'aussi. »
V		— « Tosa, ses faillensa,
		Vos dic atrasag
		Que atretal plag,
	40	Com a vos a fag
		Aquel que·us oblida,
		M'a fag una deschausida
		Qu'eu amava fort.
		Ara m'oblid'al sieu tort
	45	Per un autre, qu'eu volri' aver mort. »
VI		— « Seingner, mantenensa
		Trobas del forfag
		Que·us a fag tan lag
		La fals' ab cor frag ;
	50	E ve·us m'en aizida,
		Que·us am a tota ma vida,
		Si·m n'es en acort,
		E tornem lo desconort
		C’avem avut en joi et en deport ».
VII	55	— « Franca res grazida,
		Ma voluntait n'ai complida,
		Si·m n'es en acort,
		De vos que·m faitz a bon port
		Venir joios de tot perilh estort. »
VIII	60	— « Seingner, ses faillida,
		Estorta m'a e guerida
		Vostr' amors, tan fort
		Que de nuill mal no·m recort,
		Tan gen m'aves tot mon mal talan mort ».