Audiau, Jean. Les poésies des quatre troubadours d'Ussel, publiées d'après les manuscrits. Paris: Librarie Delagrave, 1922.

Codi: 194,018=136,006 Autor: Gui d'Ussel, Elias d'Uisel Gènere: Tenso (Partimen) Número: XIX

 

N'Elias, de vos voill auzir

I	1	N’Elias, de vos voill auzir,
		Car vos faitz d’amor conoissen,
		Car seria meills a sufrir
		A cel qui ama finamen,
	5	Qu’a mes tot son cor e son sen
		Totz temps en aver amia :
		Se, cant l’a, ella moria,
		O si per altre·l gurpia
		De qui no·ill fos tant avinen ?
II	10	Cosin, so es leu a chausir
		Me que non ai cor recrezen.
		Ans q’eu lais m’amia morir,
		Li sofr’ un pauc de faillimen,
		Qu’enans l’en soffriria cen,
	15	Puois de fin cor l’amaria ;
		Que ben leu la·m cobraria.
		Mai s’ieu morir la vezia,
		Non viuria pois longamen.
III		Et avetz mi partit razo,
	20	Dond non posc ses ira passar ;
		Mas eu vos farai alegrar,
		Qual que prendatz de ma tenso,
		E veirai si sabetz chausir
		D’aquesta razon novella :
	25	Qu’ajatz dona bona e bella
		Un jorn d’estiu o una nuoig d’invern ?
IV		Mal sabetz chausir e partir,
		N’Elias, e faitz lo parven,
		Qu’atressi volriatz faillir ;
	30	Mas ieu·m tem tan galiamen
		Per qu’eu voill mais e m’es plus gen
		S’ela mor que si·m galia ;
		Et a leis cre que meills sia
		Que s’ab blasme s’aucisia,
	35	E qu’aucises me eissamen.
V		E chausisc la coingda sazo,
		Quant aug los auzeletz chantar,
		E·l clar jorn, per mon joi doblar
		Quant remir sa bella faisso,
	40	E vos lais que voletz dormir
		La nuoig ab la viella, sella
		Que no·m par sia piucella,
		C’ab leis estias, en clar jorn, ab enfern.
VI		De fin drut non taing que s’azir,
	45	Cosin, e trobatz ho legen :
		De faillimen pot hom guerir,
		Mas en mort non ha garimen !
		Aissi avetz petit de sen :
		Be·us i faill vostra clercia ;
	50	Que·l plus savis si desvia,
		Per que mos cors s’umelia
		Vas leis, sitot il si mespren.
VII		E voill en chambra o en maiso
		Tota nuoig ab midonz estar
	55	E leis tener et abrassar ;
		E ja no voill chant d’auzello,
		Car per ren no·l poria auzir ;
		Car cui fin’ amors capdella,
		Non sap d’auzel qui favella,
	60	Anz endreg se ten lur gaug ad esquern.
VIII		N’Elias, aisso que·us aug dir,
		Sai qu’aras tenetz a nien ;
		Ben ez francs, car sabetz suffrir
		Que donna·us lais per meinz valen ;
	65	Mas ieu am per aital conven
		Que no voill que·m lais m’amia,
		Anz vuelh sa mort, s’o fazia ;
		Qu’ilh vol la soa et la mia,
		Can fai zo que no·ill estai gen.
IX	70	E si de nuog vos sap plus bo
		Vostre donz tener c’ab jorn clar,
		Doncx n’ai eu gaug c’ab l’esgarar ;
		E per que no·m digatz de no,
		Faza·n dreg Na Maria dir,
	75	Cui jois e pretz renovella,
		E fara sen, si apella
		Na Biatritz, la bella, de Tiern.
X		N’Elyas, si vostra amia
		Vos trai la nuoich ni·us galia,
	80	Vos l’amatz per cocha d’argen.
XI		Clergart, be·us trembla·il cervella ;
		Per una veilla fradella
		Anatz brandan, cum fai naus ses govern !