Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 434a,015 Autor: Serveri de Girona Gènere: Vers Número: LI

 

De Deu no·s deu nuylls hom maraveyllar

I	1	De Deu no·s deu nuyll[s] hom maraveyllar
		can fa del pa carn ver’ e del vi sanc:
	3	que non e[s] re[s] ne er ia ne fo anc
		qu’el no fezes e no pogues desfar;
		qui ve con es altz e seynoreianz
	6	no deu esser mezcreens ne dubtanz.
II		E ia fa leu, ab sol voler, tornar
		lo cel, qu’es blaus, vermeyll e neyr e blanc;
	9	e l’aygua xay tro qu’el vol que s’estanc,
		e de l’ayga fa peyra, ço es clar:
		doncs be pot far de pa carn, tant es grans:
	12	qui non o cre, trop es fols e erranz.
III		Axi com fe d’ayga vi al meniar,
		pot far, si·l platz, caval corrent d’un banc;
	15	e l’arbre vol, cant es tayllatz, que branc,
		e del fust fay exir lo fruit qui par:
		si·s fa de vi sanch; e non es bastanz
	18	de sen cil qu’es a mos ditz contrastanz.
IV		E fa soven home mort viu dreçar,
		e vol c’on leu e que·ls oylls obr’ e tanc,
	21	e de nïent lo fay dreit, e·l dreit ranc;
		e la terra fa sobre l’aygu’ estar:
		si·s fa de pa carn qu’es dign’ e presanz;
	24	eu o crey be, e tu o [deus] ab manz.
V		E can ac fayt cel e terra e mar,
		formet Adam de terra e de fanc
	27	qui fe lo mal don tu playns ez eu planc;
		de terra·l fetz vezer, auzir, parlar:
		doncs be pot far carn de pa, ses affanz,
	30	pus de terra lo fetz qu’es d’el semblanz.
VI		Tot iorn fa pan carn e vi sanc tornar
		si n[o]s gardam nos meseix e·ls enfanz,
	33	Deus qui del pa lor creys carn e·ls fa granz.
VII		La domn’ als Cartz Deus e Sobrepretz gar,
		qu’eu say qu’en re no son d’ayço dubtanz,
	36	ne·l cortes reys, ne·N Peyre·l nobl’enfanz.