Serra-Baldó, Alfons. Els trobadors. Barcelona: Barcino, 1934 (2a ed. 1998).

Codi: 080,025 Autor: Bertran de Born Gènere: Miei-sirventes Número: XVI

 

Miei sirventes vuolh far dels reis amdos

		[SIRVENTÈS]
I	1	Miei sirventes vuolh far dels reis amdos,
		qu’en brieu veirem qu’aura mais chavaliers:
		del valen rei de Castela, N’Anfos,
		qu’auch dir que ve e volra saudadiers;
	5	Richartz metra a muois et a sestiers
		aur et argen, e te·s a benananza
		metr’e donar, e no vol s’afiansa,
		anz vol guerra mais que qualha esparviers.
II		S’amdui li rei son pro ni coratjos,
	10	en brieu veirem champs jonchatz de quartiers
		d’elms e d’escutz e de brans e d’arzos
		e de fendutz per bustz tro als braiers;
		et arratge veirem anar destriers
		e per costatz e per pechs mainta lanza
	15	e gauch e plor e dol et alegranza.
		Lo perdr’er grans e·l grazanhs er sobriers.
III		Trompas, tabors, senheras e penos
		et entresenhs e chavals blancs e niers
		veirem en brieu, que·l segles sera bos,
	20	que om tolra l’aver als usuriers,
		e per chamis non anara saumiers
		jorn afiatz ni borges ses doptanza
		ni merchadiers qui venha de ves Franza;
		anz sera rics qui tolra volontiers
	25	. . . . . . . . . . . . . . . . . . . . . . . . . . . . .
IV		Mas si·l reis ve, ieu ai en Dieu fianza,
		qu’ieu serai vius, o serai per quartiers.
V		E si sui vius, er mi grans benananza,
		e si ieu muoir, er mi grans deliuriers.
		(Text d’Appel)