Serra-Baldó, Alfons. Els trobadors. Barcelona: Barcino, 1934 (2a ed. 1998).

Codi: 029,013 Autor: Arnaut Daniel Gènere: Canso Número: XXI

 

L'aur'amara     fa·ls bruoills brancutz

		[CANÇÓ*]
I	1	L’aur’amara     fa·ls bruoills brancutz
		clarzir,     que·l doutz espeissa ab fuoills,
		e·ls letz     becs     dels auzels ramencs
		ten balps e mutz,     pars     e non pars;
	5	per qu’eu m’esfortz     de far e dir     plazers
		a mains per liei     que m’a virat bas d’aut,
		don tem morir,     si·ls afans no m’asoma.
II		Tan fo clara     ma prima lutz
		d’eslir     lieis, don cre·l cors los huoills,
	10	non pretz     necs     mans dos aigonencs,
		d’autra s’eslutz     rars mos preiars;
		pero deportz              m’es e d’auzir     volers,
		bos motz ses grei,     de liei don tant m’azaut
		qu’al sieu servir     sui del pe tro c’al coma.
III	15	Amors, gara!     Sui ben vengutz,
		c’auzir              tem far, si·m dezacuoills,
		tals detz     pecs     que t’es mieills que·t trencs;
		qu’ieu soi fisc drutz              cars     e non vars;
		ma·l cors ferms fortz     mi fai cobrir mains vers,
	20	qu’ab tot lo nei     m’agr’ops us bais al chaut
		cor refrezir,     que no·i val autra goma.
IV		Si m’ampara     cill que·m tralutz
		d’aizir     si qu’es de pretz capduoills,
		del quetz     precs,     c’ai dedinz a rencs,
	25	l’er fort rendutz     clars     mos pensars:
		qu’eu fora mortz;     mas fa·m sofrir     l’espers
		que·ill prec que·m brei,     c’aisso·m ten let e baut,
		que d’als jauzir     no·m val jois una poma.
V		Doussa car’a              totz aibs volgutz,
	30	sofrir     m’er per vos mainz orguoills,
		quar etz     decs     de totz mos fadencs,
		don ai mains brutz     pars.     E gabars
		de vos no·m tortz,     ni·m fai partir     avers,
		c’anc non amei     ren tant ab meins d’ufaut;
	35	anz vos desir         plus que Dieu cill de Doma.
VI		Era·t para,     chans e condutz,
		formir              al rei qui t’er escuoills;
		car pretz,     secs     sai, lai es doblencs,
		e mantengutz     dars     e manjars.
	40	De joi la·t portz,     son anel mir si·l ders,
		c’anc non estei     jorn d’Arago que·l saut
		no·i volgues ir,     mas sai m’a clamat Roma.
VII		Faitz es l’acortz     qu’el cor remir,     totz sers
		lieis cui domnei,     ses parsonier, Arnaut;
	45	qu’en autr’albir     n’es fort m’entent’a soma.
		(Text de Bartsch-Koschwitz)