Serra-Baldó, Alfons. Els trobadors. Barcelona: Barcino, 1934 (2a ed. 1998).

Codi: 335,007 Autor: Peire Cardenal Gènere: Canso Número: XXXIII

 

Ar mi posc eu lauzar d'amor

		[CANÇÓ]
I	1	Ar mi posc eu lauzar d’amor
		que no·m tol menjar ni dormir,
		ni·n sent freidura ni calor,
		ni no·n badalh ni no·n sospir,
	5	ni·n vauc de noit a ratge,
		ni·n sui conques ni·n sui cochatz,
		ni·n sui dolens ni·n sui iratz,
		ni non logui messatge
		ni·n sui trahitz ni enganatz,
	10	que partitz m’en sui ab mos datz.
II		Autre plazer n’ai eu melhor,
		que non trahisc ni fauc trahir,
		ni·n tem tracheiritz ni trachor,
		ni brau gilos que m’en azir,
	15	ni·n fauc fol vassalatge,
		ni·n sui feritz ni derrocatz
		ni no·n sui pres ni·n sui raubatz,
		ni non fauc lonc badatge,
		ni dic qu’eu sui d’amor forsatz,
	20	ni dic que mos cors m’es emblatz,
III		ni dic qu’eu mor per la gensor,
		ni dic que·l bela·m fai languir,
		ni non la prec ni non l’azor,
		ni la deman ni la dezir,
	25	ni no·l fauc homenatge,
		ni no·l m’autrei ni·l mi sui datz,
		ni no sui seus endomenjatz,
		ni a mon cor en guatge,
		ni sui sos pres ni sos liatz,
	30	ans dic qu’eu li sui escapatz.
IV		Mais deu hom amar vensedor,
		no fai vencut, qui·l ver vol dir;
		quar lo vencens porta la flor,
		e·l vencut vai hom sebelir;
	35	e qui vens son coratge
		de las desleials voluntatz,
		don mou lo faitz desmezuratz
		e li autre outratge,
		d’aquel vencer es plus honratz
	40	que si vencia cent ciutatz.
V		Pauc pretz prim prec de preiador,
		can cre qu’el cuia convertir,
		vir vas vil voler sa valor,
		don dreitz deu dar dan al partir;
	45	si sec son sen salvatge
		leu l’es lo larcs laus lag lonhatz;
		plus pretz lauzables que lauzatz;
		trop ten estreg ostatge
		dreitz drutz del dart d’amor nafratz;
	50	per plus pretz plus pretz es compratz.
VI		No volh voler volatge,
		que·m volv’e·m vir vils voluntaz,
		mas lai on mos vols es volatz.
		(Text de Bartsch-Koschwitz)