Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Codi: 327,001 Autor: Peire Basc Gènere: Sirventes Número: XCII

 

Ab greu cossire

I	1	Ab greu cossire
		et ab greu marrimen
		planh e sospire,
		et ab perilhos turmen.
	5	can me remire,
		ab pauc lo cor no·m fen,
		ni mos huelhs vire
		que gart mon vestimen,
		que es ricx e onratz
	10	et ab aur fi frezatz
		e d'argen mealhatz,
		ni regart ma corona.
		l'apostoli de Roma
		volgra fezes cremar
	15	qui nos fay desfrezar.
II		Sesta costuma
		ni sest establimen
		non tenra gaire,
		c'an fag novelamen,
	20	car lo rey Jacme
		no fon a prezen
		ni·l apostoli,
		c'absolva·l sagramen,
		car nostres vestirs ricx
	25	an nafratz e aunitz, —
		qui o tractet sia marritz! —
		per que cascuna entenda
		que no port vel ni benda
		mais garlandas de flors
	30	en estieu per . . . .
III		Coras que vengua
		lo rey nostre senhor,
		que es semensa
		de pretz e de valor,
	35	per merce·l prenda
		c'auia nostra clamor
		de la offensa
		que fan li sieu rendor,
		que·ls vestirs an naffratz
	40	descadenatz
		e dezenbotonatz,
		per que nostras personas
		ne van pus vergonhozas;
		prec que sian tornatz
	45	per vos, franc rey, onratz.
IV		Senhors dauraires
		e los dauriveliers,
		donas e donzelas,
		que es de lur mestiers,
	50	a l'apostoli
		mandem cum messatgiers,
		que escumenie
		cosselhs e cosselhiers.
		e los fraires menors
	55	en son en grans blasmors
		e los prezicadors,
		e selh de penedensa
		ne son en malvolensa
		e li autre reglar
	60	c'o solon prezicar.
V		Vai sirventesca
		al bon rey d'Arago
		e a la papa,
		que·l sagramen perdo,
	65	car vilanesca
		an fag, si dieus be·m do,
		e ribaudesca
		nostre marit felo;
		. . . . . . . . . . . . . .
	72	quar yeu n'era pus gaia,
		la sentura m'esclaia,
		que yeu solia senchar;
	75	lassa! non l'aus portar.
VI		De ma camiza
		blanc'ai tal pessamen,
		que era cozida
		de seda ricamen
	80	gruogua e vermelha
		e negra eyssamen,
		blanca e blava,
		ab aur et ab argen;
		lassa! non l'aus vestir;
	85	lo cor me vol partir
		. . . . . . . . . . . . .
		e non es meravilha.
		senhors, faitz me esclavina,
		que aitan l'am portar
	90	can vestir ses frezar.