Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Codi: 404,007 Autor: Raimon Jordan Gènere: Canso Número: CXXIII

 

Per solatz e per deport

I	1	Per solatz e per deport
		mi conort
		d'un'amor que·m senh
		e·m destrenh,
	5	qu'eras m'adutz un talen
		don say veramen
		que morray,
		qu' i assay
		un folh ardimen,
	10	don ai espaven
		e doptansa.
II		E mas mon cor m'a estort
		de greu mort,
		no vuelh mais que renh
	15	ab fals genh;
		ans vir mon entendemen
		vas la plus valen
		qu'el mon sai,
		e metray·
	20	m al sieu chauzimen;
		e s'ilh m'o cossen,
		gen m'enansa.
III		Mas no·s cove del mieu par
		qu'aus parlar
	25	de lieys. — e per quey? —
		quar no dey
		ni tanh d'aitant enardir
		qu'ieu l'aus dir
		lo mal qu'ieu tray;
	30	ni·l diray
		ia per que s'azir;
		mas en vuelh suffrir
		greu martire.
IV		Amors, si·us plagues preyar
	35	lieys d'amar,
		feiratz gran merce
		endreit me,
		quar ses lieys no puesc guerir,
		ni hieu no l'aus dir
	40	lo mal qu'ieu trai.
		per dieu, vay
		li·m son cor ferir
		sol tan que·n cossir
		o·n sospire!
V	45	Pero far li dey saber
		qual poder
		a en mi, qu'a pres
		e conques,
		qu'ie·lh serai hom et aclis
	50	vertadiers e fis
		tostemps may.
		folh sen ay,
		quar anc re li dis,
		qu'ans seray totz gris
	55	qu'ilh m'entenda.
VI		Mas per so ay bon esper,
		que valer
		me poiria merces
		mais que res,
	60	qu'ans conquer lonhdas aclis
		qu'ergulhos vezis,
		quan s'eschay;
		per qu'ieu ai
		mon fin cor assis,
	65	qu'als no·m abelhis
		on m'entenda.
VII		Chansos, mos Guaris
		vuelh t'aprenda.