Boni, Marco. Sordello, Le poesie. Nuova edizione critica con studio introduttivo, traduzioni, note e glossario. Bologna: Palmaverde, 1954.

Codi: 225,014=437,030 Autor: Guilhem de Montanhagol, Sordel Gènere: Tenso (Partimen) Número: XVI

 

Senh'en Sordelh, mandamen

I	1	«Senh’en Sordelh, mandamen
		ai del ric comte plasen
		proensal, qu’a pretz valen,
		que·us deman si·us plairia
	5	mais, ni·us parria plus gen
		que saupes vostr’amia
		vostre cor, si com l’amatz,
		o que vos lo sieu sapchatz,
		si·us am’o etz galiatz.
	10	Chauzetz a vostra guia,
		qu’ieu say be qual penriatz,
		qui no·us en reprendia».
II		«Montanhagol, per un cen
		me seria plus plazen
	15	que cylh per qu’ieu muer viven
		saupes be, on qu’ilh sia,
		mon cor cuy ten en turmen,
		que s’ieu lo sieu sabia;
		quar si·lh mostrava vertatz
	20	cum suy per lieys turmentatz,
		penria li·n piatatz,
		o totz sos cors seria
		durs cum peira, freitz cum glatz,
		tan que merce n’auria».
III	25	«Sordel, mais val veramen
		sapchatz lo cor e·l talen
		de lieys qu’amatz finamen,
		si·us am’o si·us gualia,
		quar soven sotz belh parven
	30	se rescon gran[s] falsia;
		e, si·us trobatz enguanatz,
		trop semblaretz fo[r]senatz,
		si pueys amatz desamatz,
		ni seguetz la follia;
	35	quar, pueys qu’om ve sas foudatz,
		fols es si no·s chastia».
IV		«Montanhagol, yeu no pren
		per lieys lunh galiamen
		cuy am e sierf lialmen,
	40	si be·l plai que m’aucia,
		per que mon fin cor, qu’ie·l ren
		vuelh sapcha, on qu’ilh estia,
		quar leu m’er en joy tornatz
		le dols don suy trebalhatz,
	45	pus sabra sos cors prezatz
		cum languisc nueg e dia,
		ni qu’en lieys cuy suy donatz
		es ma mortz e ma via».
V		«Sordelh, yeu tenc a non sen
	50	qui en autruy chauzimen
		met son fach, qu’adrechamen
		per si far [o] poiria;
		per qu’ieu tenc a mais valen
		que saupessetz la via
	55	del cor e totz sos pessatz
		de la bella don chantatz,
		que s’ilh sap cum la cuiatz
		enganar, si·us crezia.
		S’es aitals cum la lauzatz
	60	folla er s’en vos se fia».
VI		«Pus fi de mi eys prezen,
		Montanhagol, franchamen
		a lieys que m’a ses conten,
		no fuy en ma baylia,
	65	enans ai estat languen
		fis en sa senhoria;
		don s’era ben acertatz
		sos cors don mieus es greujatz,
		leu seria coronatz
	70	del joy qu’ueymais deuria
		venir, don suy totz secatz
		d’enveya e de feunia».
VII		«Sordelh, le ricx coms prezatz,
		on es fis sabers triatz,
	75	proensals, jutge, si·l platz,
		esta nostra partia,
		qu’ieu enten qu’om vius ni natz
		mielhs no la jutjaria».
VIII		«Quar mos senher es lauzatz,
	80	pauc duptans et pro duptatz
		per selhs cuy es desamatz,
		Montanhagols, li sia
		le jutgamens autreyatz,
		tortz o dregz, quals que sia».