Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Codi: 248,049 Autor: Guiraut Riquier Gènere: Pastorela Número: IX

 

L'autre jorn, m'anava (1260)

I		L'autre jorn, m'anava
		Per una ribeira,
		Soletz delichan,
		Qu'Amors me menava
	5	Per aital maneira
		Que pesses de chan;
		Vi gaya bergeira,
		Bell'e plazenteira,
		Sos anhels gardan;
	10	La tengui carreira,
		Trobei la fronteira
		A for benestan,
		E fe·m belh semblan
		Al primier deman.
II	15	Qu'ieu li fi demanda:
		— « Toza, fos amada
		Ni sabetz amar? »
		Respos mi ses guanda:
		« Senher, autreyada
	20	Mi suy ses duptar. »
		— « Toza, mot m'agrada
		Quar vos ai trobada,
		Si·us puesc azautar. »
		— « Trop m'avetz sercada,
	25	Senher? Si fos fada,
		Pogra m·o pessar. »
		— « Toza, ges no·us par? »
		— « Senher, ni deu far. »
III		— « Toza de bon aire,
	30	Si voletz la mia
		Yeu vuelh vostr'amor. »
		— « Senher, no·s pot faire:
		Vos avetz amia
		Et ieu amador. »
	35	— « Toza, quon que sia
		Ye·us am, don parria
		Que·us fos fazedor »
		— « Senher, autra via
		Prenetz, tal que·us sia
	40	De profieg major. »
		— « Non la vuelh melhor. »
		— « Senher, faitz folhor. »
IV		— « No folley, Na Toza;
		Tan m'es abellida
	45	Qu'Amors m'o cossen. »
		— « Senher, fort cochoza
		Son que fos partida
		D'aquest parlamen! »
		— « Toza, per ma vida,
	50	Trop es afortida,
		Qu'ie·us prec humilmen. »
		— « Senher, no m'oblida
		Tropa for'aunida,
		Si crezes leumen. »
	55	— « Toza, forsa·m sen. »
		— « Senher, no·us er gen. »
V		— « Toza, que que·m diga,
		Non ajatz temensa,
		Que no·us vuelh aunir. »
	60	— « Senher, vostr'amiga
		Suy quar conoyssensa
		Vo·n fai abstenir. »
		— « Toza, quan falhensa
		Cug far, per sufrensa
	65	Belh Deport m'albir! »
		— « Senher, mot m'agensa
		Vostra benvolensa,
		Qu'ar vos faitz grazir. »
		— « Toza, que·us aug dir? »
	70	— « Senher, que·us dezir. »
VI		— « Digatz, toza gaya,
		Que·us a fag dir ara
		Dig tan plazentier? »
		— « Senher, on que·m vaya,
	75	Gays chans se perpara
		D'En Guiraut Riquier. »
		— « Toza, ges encara
		Le ditz no·s despara
		De qu'ieu vos enquier. »
	80	— « Senher, no·us ampara
		Belhs Deportz, que·us gara,
		De laus esquerrier? »
		— « Toza, no·m profier. »
		— « Senher, a·us entier? »
VII	85	— « Toza, tot m'afara
		May ·N Bertrans m'ampara
		D'Opian l'entier. »
		— « Senher, mal si gara;
		Et iretz vo·n ara,
	90	Don ai cossirier. »
		— « Toza, sovendier
		Aurai est semdier. »