Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Codi: 248,032 Autor: Guiraut Riquier Gènere: Pastorela Número: XI

 

Gaya pastorelha (1264)

I		Gaya pastorelha
		Trobey l'autre dia,
		En una ribeira,
		Que per caut la belha
	5	Sos anhels tenia
		Desotz un'ombreira:
		Un capelh fazia
		De flors e sezia
		Sus en la fresquiera.
	10	Dissendey en via,
		Que s'amor volia
		En calque maneira.
		Ylh fon prezenteira,
		Sonet me primeira.
II	15	Dissi li: « Poiria
		De vos solatz traire
		Pus m'es agradiva? »
		— Ylh dis que queria
		Amic de bon aire,
	20	Nueg e jorn pessiva
		— « Toza, ses cor vaire,
		E senes estraire,
		M'auretz tant quan viva. »
		— « Senher, be·s pot faire,
	25	Quar, a mon vejaire,
		Amors vos abriva. »
		— « Toza, oc, esquiva. »
		— « Senher, be ys sobtiva. »
III		— « Toza, s'ans de gaire
	30	No m'en faitz valensa,
		Vostr'amors m'esglaya. »
		— « Senher, ab maltraire
		Conquer hom guirensa,
		Donc espers vos playa. »
	35	— « Toza, tant m'agensa
		Vostr'amors e·m tensa,
		Qu'ops m'es qu'ades l'aya. »
		— « Senher, en parvensa
		Mai no m vis ; falhensa
	40	Faria savaya. »
		— « Toza, ·l vista·m playa. »
		— « Senher, donc no ys gaya? »
IV		— « Toza, tant comensa
		L'Amors ab martire,
	45	Qu'ops m'es vostr'ajuda. »
		— « Senher, ab temensa,
		M'avetz en dezire
		Bien quatr'ans tenguda. »
		— « Toza, no m'albire
	50	Qu'ie·us vis mai; no·us tire
		Si ar etz ma druda! »
		— « Senher, be·us puesc dire
		Que·n faretz mans rire:
		Suy desconoguda? »
	55	— « Toz', etz esperduda? »
		— « Senher, non, ni muda.' »
V		— « Toza, no·m cossire
		Tant qu'aisso entenda:
		Etz ges la chantada? »
	60	— « Senher, quan que·us tire,
		Pro er qu'ie·us car venda
		Vostr' amor malvada. »
		— « Na toza, contenda
		Ai ab vos d'emenda
	65	Totaz vetz trobada. »
		— « Senhe· N Guiraut, renda,
		Riquier, tanh que·us renda
		Aital, quar suy fada.
		— « Toz', ans etz membrada. »
	70	— « Senher, s'o m'agrada!»
VI		— « Toza, tal fazenda
		Ai qu'ops m'es que·y tenda;
		A Dieu siatz dada! »
		— « Senher, aissi·us prenda
	75	Per tot ses emenda;
		E ve·us vostr' estrada. »
		— « Toza, etz irada. »
		— « Oc, per vostr'anada. »