Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Codi: 248,015 Autor: Guiraut Riquier Gènere: Pastorela Número: XIV

 

A Sant Pos de Tomeiras (1282)

I		A Sant Pos de Tomeiras
		Vengui l'autre dia,
		De plueja totz mullatz,
		En poder d'ostaleyras
	5	Qu'ieu no conoyssia;
		Ans fuy meravelhatz,
		Per que·l viella rizia,
		Qu'a la jove dizia
		Suau calque solatz;
	10	Mas quasquna·m fazia
		Los plazers que sabia
		Tro fuy gen albergatz;
		Que agui sovinensa
		Del temps que n'es passatz,
	15	E cobrey conoyssensa
		De·l vielha, de que·m platz.
II		E dissi·l: « Vos etz selha
		Que ja fos bergeira
		E m'avetz tant trufat ».
	20	Elha·m dis, non pas felha:
		— « Senher, mais guerreira
		No·us serai per mon grat ».
		— « Pro femna, de maneira
		Tal vos vey segon teyra
	25	Qu'esser deu chastïat ».
		— « Senher, s'ieu fos leugeira
		Non a trop qu'en carreira
		Fuy de trobar mercat ».
		— « Pro femna, per aizina
	30	Fon dich d'ome cochat. »
		— « Senher, ans suy vezina
		D'est amic non amat ».
III		— « Pros femna, d'aital toza
		Cum vos deu amaire
	35	For esser dezirans ».
		— « Senher Dieus! Per espoza
		Mi vol; mas del faire
		No suy ges acordans ». —
		— « Pros femna, de maltraire
	40	Vos es ben temps d'estraire,
		Si es hom benanans ».
		— « Senher, assatz ad aire
		Pogram viure; mas paire
		Lo sai de .VII. efans ».
	45	— « Pros femna, gent servida
		Seretz per sos filhs grans ».
		— « Senher, ja·n suy marida,
		Q'un no n'a de .X. ans ».
IV		— « Na femna descenada,
	50	De mal etz estorta,
		E peitz anatz sercan ».
		— « Senher, ans suy membrada,
		Que·l cor no m'i porta
		Si que·n fassa mon dan ».
	55	— « Pros femna, via torta
		Queretz, don seretz morta,
		So·m pes, enans d'un an ».
		— « Senher, ve·us qui·m coforta,
		Quar de mon gaug es porta,
	60	Selha que·ns es denan ».
		— « Pros femna, vostra filha
		Es, segon mon semblan ».
		— « Senher, pres de la Ilha,
		Nos trobes vos antan ».
V	65	— « Pros femna, doncx emenda
		Convenra que·m fassa
		Per vos de motz pezars ».
		— « Senher, tant o atenda
		Qu'a sso marit plassa,
	70	Pueys faitz vostres afars ».
		— « Pros femna, no·us espassa,
		Enquers, e dura·us massa
		Maishuey vostre trufars ».
		— « En Guiraut Riquier, lassa
	75	Suy quar tant seguetz trassa
		D’aquestz leugiers chantars ».
		— « Pros femna, quar vilheza
		Vos a faitz chans amars ».
		— « Senher, de vos se deza
	80	Tant qu'als vielhs non etz pars! »
VI		— « Pros femna, de mal dire
		No·m feratz temensa,
		Mas aisso solatz par ».
		— « Senher, ges no m'albire
	85	Que ma malsabensa
		Vos saubessetz pessar ».
		— « Pus e vostra tenensa
		Suy, ben devetz sufrensa
		De tot ab mi trobar ».
	90	— « Senher, ges no m'agensa
		Qu'ie·us diga ren per tensa,
		Ni·us fassa malestar ».
		— « Dona, ja no poiriatz,
		Quar no·us puesc desamar ».
	95	— Senher, quant o fariatz,
		Ye·us vuelh totz temps honrar ».
VII		— « Al pro Comte agensa
		D'Astarac nostra tensa,
		Dona, qu'om deu lauzar ».
	100	— « Senher, sa grans valensa
		Lo fai ab bevolensa
		A totas gens nomnar ».
		— « Dona, si·l sa veziatz,
		Saubessetz l’amparar? »
	105	— « Senher, ben auziriatz
		Que n'ay en cor a far ».