Meyer, Paul. Les derniers troubadours de la Provence d'après le chansonnier donné à la Bibliothèque Impériale par M. Ch. Giraud. Paris: Librairie A. Franck, 1871.

Codi: 427,006 Autor: Rostaing Berenguier de Marseilla Gènere: Sirventes Número: X, 1

 

Si com trobam clar el vielh Testamen

		MOSEN ROSTANH BERENGUIER DE MASELHA. (f. 8 vº)
I	1	Si com trobam clar el vielh Testamen
		Et el novelh, alcun son traspasat
		Que per vertut alcuna son lauzat,
		Mas la vertut agron singuralmen
	5	LOT fon lauzat per tener franc hostal,
		E per so sol honor ac temporal
		Hen fon amat e n’estet en sa vida
		Entre las gens ab gran fama grazida.
II		De JOP trobam que pres pasiemen (f. 9)
	10	Man grieu turmen e dan quel foron dat ;
		E fom (sic) tan ferm que per aversitat
		Que sostengues, ni per grieu languimen,
		Per perdemen, per dolor ni per mal,
		Tant hac en Dieus [e]speransa lial,
	15	Non fon enicz c’ab volontat servida
		So c’a Dieu plac pres hestz mes so sa guida.
III		SALAMON aug per gran enseinhamen
		Per los anticz els sans escrigz nomnat(z),
		E per so sol conquistet laus prezat,
	20	Ses plus vertut, entre l’antigua jen,
		E guazainhet honor e pres cabal
		Per aquesta vertut [e]spesial ;
		Si que de luy vezem que son cais crida
		Nostre pairon per razon abelida.
IV	25	Per vera fe, ab ver entendemen,
		Trobam per cert que conoc en vertut
		HABRAAM Dieu, si que la Trinitat
		Li demostret, qu’el la vi claramen ;
		Per que vezem que vera fe li val
	30	Qu’el n’es pauzat[z] el palays eternal,
		Car vera fe trobam per cert que guida
		Verai fiel en eternal partida.
V		[E]speransa de lial salvamen
		Hac SIMEON per la Nativitat
	35	De Jhesu Crist, que[l] tenc car abrassat
		Hel perhufri el temple dignamen ;
		E per so hac guizardon atretal
		Qu’en fon pauzat el trip celestial
		Ab autres sans en gloria complida
	40	Que mays non er defailhens ni fenida.
VI		ALEXANDRI per donar francamen
		E per vertut de fin cor ferm fermat,
		Comques lo mon, per que son remenbrat
		Syei honrat fatz e siey afortimen ;
	45	E donet mot, el don foron rial ;
		Ez ab tot so alcun fal deslial
		Abreugeron a lur gran tort sa vida,
		Perqu’entrels pros lur fama yai aunida.
VII		Et ieu ai tal seinhor, hon claramen (v°)
	50	Ha Dieus per cert tot emseins ajustat
		Tot aquest ben e mot mais de bontat,
		Si con cascuns pot vezer claramen ;
		Per que pel mon a lauzor general,
		Lo maïstre noble de l’Espital,
	55	Monsen Folco del Viralet, formida
		Valor avent, pros en tota partida.
VIII		Lot retrais clar, tan vieu honradamen,
		El quosans Jop per gran humelitat,
		E Salamon, tan li a Dieu donat,
	60	Si com legem, de clar enseinhamen ;
		Per vera fe Habraam atretal,
		Per bon esper Simeon, quel mortal
		Turmen de Crist dis, ans que fos aunida
		Li Dezitat per la gen descauzida.
IX	65	Alexandre retrays per ardimen,
		E per franc cor am liberalitat ;
		Els profetas per voler veritat,
		Els poinhedors per son aut estamen.
		Per que vezem que Dieus lo creis hel val ;
	70	Qu’el en troba guazainh otra captal,
		Que sobrel pros par con rosza florida
		Sobr’ autra flor en vert fuelh espandida.
X		Del maïstre noble de l’Espital,
		Monsen Folco del Viralet cabal,
	75	Pot hom tant dir c’a valor tan complida
		Que sos semblantz non es en esta vida.
XI		A Dieu fauc prec quel guis el gart el sal
		E sel[s] que l’an amat de cor lial,
		E lur don gaug, qu’ieu n’auria ma partida,
	80	Car nueg ni jorn son franc cors non m’oblida.