Meyer, Paul. Les derniers troubadours de la Provence d'après le chansonnier donné à la Bibliothèque Impériale par M. Ch. Giraud. Paris: Librairie A. Franck, 1871.

Codi: 308,001 Autor: Motet Gènere: Canso Número: XIII

 

Sitot d'amors suy destretz nueh e dia

		En MOTER (f. 49)
.lxij.
I	1	Sitot d’amors suy destretz nueh e dia
		Tot chantarai, pos n’ai bona razon,
		C’anc non trobiei anc par ni compainhon
		Tant jent com ieu saupes amar s’amia,
	5	Car sel qu’ieu am de bon cor et dezir
		Nom vol amar, ans cre quem vol ausir ;
		Per ho s’ieu muer per leis quem dezenansa
		Tener m’o dei a mot gran ben[est]ansa.
II		Per ho sieu soy, mas ill non es jes mia,
	10	Ez a’n gran tort, mas Dieus li o perdon,
		C’amar la vuell trop mais ses guizardon
		Que d’autr’aver tot cant dar mi poiria ;
		E pot mi far en brieu d’ora morir,
		En pot, sill plai, de mon grieu mal guarir,
	15	Mas plus jent l’er, pos qu’en leis ay fizansa.
		Si mi gueris de ma greu malanensa.
III		A vos m’autrei ez a vostra condia,
		Plazen donna, de bon cor, eus mi don ;
		Pero vers es quez anc nul temps non fon
	20	Quez ieu non fos sotz vostra seinhoria,
		Ez am vos tant qu’en ren als non consir,
		Perquem degras d’ostr’amor far jhauzir
		Sivals d’aitant m’acses en remenbransa
		Qu’ieus ams sitot ren plus non m’en avansa.
IV	25	Valent donna, per vos planc e sospir
		Tant qu’en serai fort leu pres del fenir,
		Si nom secors vostra guaya condansa,
		Qu’ieu plus nous quier mas la bella semblansa.
		Gentil donna, en vos ay m’esperansa
	30	Qu’eser non vuell ses vos seinher de Fransa.