Meyer, Paul. Les derniers troubadours de la Provence d'après le chansonnier donné à la Bibliothèque Impériale par M. Ch. Giraud. Paris: Librairie A. Franck, 1871.

Codi: 050,001 Autor: Berenguier Trobel Gènere: Canso Número: XIV, 2

 

Aysi con sel que ses forfag es pres

		BERENGUIER TROBEL. (f. 33)
xxij.
I	1	Aysi con sel que ses forfag es pres
		Et a gran gaug cant si pot desliurar,
		M’o tenc a ben can me puesc deslunhar
		D’amor c’an goy en son atrag m’a mes.
	5	Tot ayssim pren con del malvay seinhor
		Que ses benfag vol serviz es honor,
		E pert son temps sel que vol envelhir
		Am seinhorieu don(s) bens nol pot venir.
II		Ieu cuyava que grans bens mi vengues,
	10	Mas dant pren hom mantas ves en cuyar ;
		Per me ho say que fol m’a fag tornar
		Aytan cant ieu fuy as Amors sosmes ;
		Mas non ho planc, que mais trobam valor
		Ab sells qu’enans passon per la follor ;
	15	Mas tant si pot hom en foldats noirir
		Que non s’en pot pueys lunhar ni partir.
III		Ben m’era ieu de follia entrames,
		Mas ieus diray que m’o fazia far :
		Car semblavam degues guizardonar,
	20	Qui volontiers pren serviz’es ganres,
		Mas ya negus non si fys en amor :
		Qui mays la serv, sel n’a mays de dolor,
		E za vi tal[s] que s’en cuidan jauzir,
		Mas qui mays n’a mays n’a que repentir.
IV	25	Juoc et erguelh et amor, aquest tres
		An .j. foll ayp plazen al comensar,
		E ya non er, qui lur vol poder dar,
		Non dechayan sel que n’es plus apres,
		Car en permier fan semblan de ricor
	30	Et en derier tornan lur gaug en plor ;
		Per c’on si deu al comensar gandir
		De tot afar que trop ven per dezir.
V		Aras diran sels ques feinhon cortes
		Que pron agra en mi que castiar,
	35	E so’s ben ver, mas en l’autruy afar
		An mays de sens qu’en lo sieu mantas ves.
		Ieu non castic, mas retras ma follor ;
		Sel sap del mal que n’a sufert dolor,
		E pot hom ben en mon retrag auzir
	40	Cal pron ha sells ques vol d’amor servir.