Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Codi: 174,006 Autor: Gavaudan Gènere: Pastorela Número: IV

 

L'autre dia, per un mati

I		L'autre dia, per un mati,
		Trespassava per un simelh,
		E vi, dejos un albespi,
		Encontra· l prim ray del solelh,
	5	Una toza que·m ressemblet
		Sylh cuy ieu vezer solia;
		E destolgui·m de la via
		Vas lieys; rizen me saludet.
II		Totz jauzions, de mon rossi
	10	Dessendey jos sobre·l gravelh;
		E pres me pel ponh, josta si
		Assec me a l'ombra d'un telh,
		Et  anc novas no·m demandet:
		No sai si me conoyssia;
	15	Ilh? Oc — per que·us mentria? —
		Que· ls huelhs e la cara·m baizet.
III		Per pauc de joy no m'endurmi
		Quan mi toqueron siei cabelh.
		—  « Bella, fi·m yeu, cum etz aissi?
		Dombridieus crey m'o apparelh ».
	20	—  « Senher, oc, quar nos ajustet
		Qu'alre no vuelh ni queria,
		E, si·us platz, a mi plairia
		So don hom plus me castiet ».
IV	25	— « Amiga, segon qu'ieu devi,
		Tort n'ey si ja mais m'en querelh!
		Pus tan privada etz de mi,
		Dir vos ey mon privat cosselh:
		Amors m'a tout so que·m donet,
	30	Selha que mout m'abellia;
		Ar no sey vas on se sia,
		Per qu'anc res pueys no·m conortet. »
V		— « Senher, tan sey d'aquest lati,
		Per que la nuech cossir e velh:
	35	Anc pueys, pus de vos me parti,
		Li mey huelh no preyron sonelh;
		Mal o fey qui tan vos lonhet!
		E res sos faitz non l'embria,
		Que la nostra companhia
	40	Estara mielhs qu'anc non estet. »
VI		— « Amiga, per bon endesti
		Crey que·m det Dieus aquest parelh,
		Joy de cambra en pastori,
		Que m'es dous, don me meravelh.
	45	Et anc mais tan be no·ns anet;
		Vostra merce e la mia,
		Yssit em d'autra baylia:
		Et Amors en mi no·s pecquet. »
VII		— « Senher, Na Eva trespasset
	50	Los mandamens que tenia,
		Et qui de vos me castia
		Aitan se muza en bavet. ».