Meyer, Paul. Les derniers troubadours de la Provence d'après le chansonnier donné à la Bibliothèque Impériale par M. Ch. Giraud. Paris: Librairie A. Franck, 1871.

Codi: 359,001=415,001 Autor: Peire Trabustal, Rainaut de Tres Sauzes Gènere: Tenso (Partimen) Número: XXV, 1

 

Amix Raynaut, una donna valent

		Tenson de PEYRE TRABUSTAL e de RAYNAUT DE TRES SAUSES *. (f. 21 vº)
I	1	Amix Raynaut, una donna valent
		Quez es rica e de gran parentat
		Vos vol donar s’amor e s’amistat,
		Que la vulatz amb aytal convenent
	5	Que sia de vos ho molier ho amia,
		Car d’autramens dis que ren non faria ;
		Per qu’iey vos prec mi digas que volres ;
		Respondes mi e gardats com penres.
II		— Compans Peyre, cant aras de present
	10	L’amia vuell per bona lialtat,
		Car d’autramens yeu seria enguanat
		C’il era tauls c’alous ames nient ;
		Mays pus qu’illi mi vol mostrar la via
		Qu’ieu dey tenir, ben faria g[r]an folia
	15	S’ieu era tals qu’iey non li autreyes
		D’avansar mi, ez aco en tous bes.
III		— Amix Raynaut, Dieus formet de nient
		Cel, terra, mar, tenebras e clardat,
		E pueys creet Adam, que per pecat
	20	Fon condamnat per son gran faliment
		Car traspaset so que Dieus dig avia ;
		E vos sabes c’a Dieus non plas amia,
		Per qu’ieyn volria que molier prezeses,
		Car atresi, cant que tric, la penres.
IV	25	— Compans Peyre, ben sabes verament
		Que Dieus puga cel c’a humilitat
		E baysa cel qu’en erguel es montat,
		Qu’em pauc d’ora lo torna a nient ;
		Do[n]cx, pus qu’illi enver[s] mi s’umilia,
	30	Ben dey pensar tenir non la poyria
		Si con a ley pertenria c’o fezes,
		Car il er tals d’umilitat al pres.
V		— Amix Raynaut, a mi non plas content,
		E majormens cant si fa d’oulontat ;
	35	E vos sabes que Dieus a comandat,
		E es escrig el cinque mandament,
		C’om non dessir follamens sa vezina,
		Car rimour n’ieys, bregua ez atazina ;
		Ben sabes vos de Sanson con ho fes
	40	Que ben mes mort esgardas con l’enpres.
VI		— Compans Peyre, yeu truob apertament
		Qu’amor non val si no y a caritat,
		E ges non val anquas lo pres d’un dat
		S’a si non l’a trastot permierament ;
	45	Do[n]xs trobe yeu caritat non auria
		A mi mezes si con aver deuria,
		Car mi dey far permi[e]ramens valers,
		Pues non mi cal d’eser a nul sos mers.
VII		Tenson, vay t’en a Tarasco corent,
	50	Tro Berenguier non ti sies restancat ;
		E cant m’auras a lui recomandat,
		E tu li dis de ma part humilement
		Que yeu sui sieus a calque part que sia ;
		E pregue li per sa gran cortezia
	55	Quez el garde que frau non s’i comes
		En sest partit que yeu li ay trames.
VIII		A tal que sabp de liai jugament
		Con si deu far e non sufre barat,
		Mi recoman, am tota ’militat,
	60	A far e dir trastot lo cieu talent
		Tant cant viuray, ez aco ses bauzia,
		Car d’autramens illy non amaria
		Ren c’om penses en que nul mal agues ;
		Ses dir lo nom pron o sabp tota res.