Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori
* Bibliografia de l'edició
* Glossari

* Davantal
* Bibliografia
* Testimonis
* Aparat crític
* Notes
* Traduccions
* Imatges

 

Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Codi: 194,014 Autor: Gui d'Ussel Gènere: Pastorela Número: VIII

 

L'autre jorn, per aventura

I   L'autre jorn, per aventura,
    M'anava sols cavalguan,
    Un sonet notan;
    Trobey toza ben estan,
  5 Simpl'e de bella faitura,
    Sos anhels guardan.
    E quand ylh m'auzi chantan,
    Trays s'enan,
    E pres me pel fre e jura
  10 Qu'anc tan mal no fezi chan,
    E cridet: « Robi, no·s n'an! »
     
II   — « Toza, belha creatura,
    Fi·m ieu, cal forfag tan gran
    Vos ai fag si·m chan? »
  15 Ylh respon ab mal talan:
    « Quar lieys qu'era fin'e pura
    Apelletz d'enjan. »
    E Robis venc ab aitan,
    Menassan;
  20 Mas, quan me vi, m'asegura,
    E·m ditz que no·y penrai dan;
    Qu'assatz n'ay ieu pres ogan!
     
III   Mas, quan vi qu'elh non a cura
    Que·m fezes ren mal estan,
  25 Ylh s'en va ploran,
    E Robis dic sospiran:
    « Pauc val merces ni dreytura,
    Lai on poder an,
    Per qu'ieu tenc per fol aman
  30 Qui las blan,
    Quar aitals es lur natura,
    Que dels falhimens que fan
    Volon nos sufram l'afan. »
     
IV   — « Robi, laissatz la rancura,
  35 E cercatz, que·us o caman,
    Tal que no·us enjan;
    Et eu amarai Duran,
    Que·m vol donar tal centura
    Que val un bezan,
  40 E vos no·m donetz un gan,
    D'asquest an,
    Ni no·us peza·l desmesura
    D'est fol mal dizen truan
    Per que m'anatz encolpan. »
     
V 45 Mas Robis, cum folatura,
    Que que s'agues dit denan,
    Vai s'umilïan;
    Mas ylh no l'au per semblan,
    Anz fuy on plus la conjura,
  50 E·l fols sec prejan.
    Et ieu, que·ls vau remiran
    Que faran,
    Met m'apres en l'ambladura;
    Mas pero no·m cochey tan
  55 Que no·ls encontres baizan.
     
VI   E dissero·m en gaban
    Que m'en an
    Quere merce ni dreitura
    A lei don menti chantan,
  60 E que m'en lais ab aitan,
     
VII   Et ieu, que·ls vi embrassan
    E baizan, Prec
    Dieu que·m don aventura
    Qu'ieu trop dona ses enjan,
  65 Ab que fassa so qu'els fan.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI