Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,013 Autor: Giraut de Bornelh Gènere: Canso Número: I

 

Er'ai gran joi que·m remembra l'amor

I	1	Er’ai gran joi que·m remembra l’amor
		Que·m te mo cor salf en sa fezeltat ;
		Que l’altr’ er vinc en un verger, de flor
		Tot gen cobert ab chan d’auzels mesclat,
	5	E can estav’en aquels bels jardis,
		Lai m’ aparec la bela flors de lis
		E pres mos olhs e sazic mo coratge
		Si quez anc pois remembransa ni sen
		Non aic mas can de leis en cui m’enten.
II	10	Ilh es cela per cui eu chan e plor ;
		Tan mes en me fi talan esmerat !
		Soven sospir e soplei et azor
		Vas lai on vi resplandir sa beltat.
		Flors de domnas, cui aclin e grazis,
	15	Es aicela que tan gen m’a conquis,
		Dolz’e bona, umils, de gran paratge,
		En fachs gentils, ab solatz avinen,
		Agradiva vas me a tota gen.
III		Be fora rics, s’auzes dir sa lauzor,
	20	C’a tota gen vengra l’auzirs en grat ;
		Mas paor ai que fals lauzenjador
		Fel et esquiu, sobredesmezurat
		M’entendesson et — a·i trops d’enemis
		A cui no platz ! — c’om se fassa devis.
	25	Mas can veirai ome de so linhatge,
		Baizar l’ ai tan, tro la bocha m’i fen ;
		Tan d’amor port al seu bel cors jauzen !
IV		Ja no laissetz per me ni per Amor,
		Fals lauzenger complit de malvestat,
	30	E demandatz cui ni cals es ni or,
		S’es lonh o pres ; c’aisso·us ai ben emblat !
		C’ans fos eu mortz qu’en aital mot falhis
		C’amic non ai be d’aisso no traïs ;
		Car om non es non aia per uzatge
	35	Un fol vezi que·l vai mal enqueren,
		Per c’us no·s fiz en filh ni en paren.
V		Era diran de me escharnidor :
		‘A ! enfantils com te sos olhs en fat
		E s’achambra d’orgolh e de ricor !’
	40	Qu’eu no consir, s’er’en un gran merchat,
		Mas can de leis on mo cor s’es assis
		E tenh los olhs viratz vas cel païs
		On ilh estai e parl en mo coratge
		Ades de leis on mo fi cor s’aten ;
	45	Que non ama qui non o fai parven.