Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,066 Autor: Giraut de Bornelh Gènere: Canso Número: V

 

S'era no poia mos chans

I	1	S’era no poia mos chans,
		No sai per que mais s’enans,
		E si no·n val dos aitans
		Que far no solia,
	5	Ben auras drech lo·m soans. —
		E per que? — No m’o demans ;
		Qu’eu no t’o diria !
II		E si·m seras drogomans ? —
		A cui ? — Leis cui sui comans. —
	10	E com entendra tos mans ? —
		Ja d’aco no·t sia ;
		Que·l dichs e·l fachs e·l semblans
		E·l noms e·l pretz e·l bobans
		T’er guitz en la via.
III	15	E tu ja·t fas conoissens ? —
		Eu oc. — E donc non entens
		C’us motz fatz fass’aprendens
		E ses maestria ? —
		Si fatz be, mas tot es sens ! —
	20	Per que volh que tota gens
		Li port garentia.
IV		Que·l seus bels cors convinens
		Es assazatz e manens
		De totz bos ensenhamens
	25	E de cortezia ! —
		Ja n’auras tu malvolens,
		Car en trop lauzar t’emprens. —
		E que·m graziria ?
V		S’eu enemics e guerrers
	30	No·m fazia volonters?
		C’us enoios fols parlers
		Trob’om chascu dia!
		Fors qu’eu no sui sobransers,
		Mas, si la·m blasmav’Augers
	35	Eu lo·i combatria.
VI		Que·l seus laus es drechurers
		E·l noms vers e·l pretz enters,
		E si m’era vis esters,
		No·m n’entrametria ;
	40	C’anc fort no fui sovenders
		D’aitals lauzars plazenters
		Ni non o seria.
VII		E tu, que ? — Tanh sos lauzars ? —
		Ja m’en forsa sobramars. —
	45	Mais t’en valria chalars ! —
		Be·n ditz gran folia;
		Que, per Deu, sol lo parlars
		M’adutz tals cen bos pensars
		C’us quecs m’en valria. —
VIII	50	E si tos dichs no te chars,
		No t’en volgras esser pars ? —
		Eu no per re ; que·l cudars
		M’aiud’e m’embria,
		So m’es vis, totz mos afars
	55	E valra·n mais mos chantars
		Per aital paria !
IX		E si·l bos reis dels Navars
		M’o lauza, de mans blasmars
		Gaire no·t daria.