Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,012 Autor: Giraut de Bornelh Gènere: Canso Número: VIII

 

Aquest terminis clars e gens

I	1	Aquest terminis clars e gens,
		Qu’es tan deziratz e volgutz,
		Deu esser ab joi receubutz
		E chascus en sia jauzens,
	5	Car ven estatz
		Ab sas clartatz !
		A cui no platz
		Jois ni solatz,
		Non es amatz
	10	Ni amaire.
II		A me melhura mos talens
		Pel joi, car issem a la lutz.
		Que totz lo deportz e·l desdutz
		Conve qu’esta sazo comens.
	15	Pos vei los pratz
		E·ls bois folhatz,
		Eu volh sapchatz
		Per amistatz
		Sui envezatz
	20	E chantaire.
III		Mo cor es plus gais e salhens,
		Car m’es us messatgers vengutz
		Que·m retrai d’un’amor salutz,
		Don me ve jois e jauzimens.
	25	Si·m sui estatz
		Lonc tems iratz,
		Dezacordatz,
		D’amor sebratz,
		Er posc assatz
	30	De joi faire.
IV		Molt es grans la proez’e·l sens
		Qu’el’a; tan bos sabers adutz
		C’anc no fo per leis mentagutz
		Orgolhs ni no·lh passet las dens ;
	35	C’umilitatz,
		Don es chargatz
		Sos cors prezatz,
		La ten en patz
		E·lh ditz : Parlatz
	40	E — no gaire !
V		Sobre totz bos ensenhamens,
		Aitan fort es sos pretz cregutz,
		Es lo seus per melhor tengutz
		Ni ja no l’en er fachs contens;
	45	Ans a poiatz
		Los aussors gratz
		C’als plus senatz
		Es, so sapchatz,
		Greus la meitatz
	50	A retraire.
VI		Tan es rich’e pros e valens
		Cela de cui eu sui rendutz,
		Per qu’eu no dei esser crezutz
		C’Amors me des tans d’ardimens
	55	Que si fors’ atz !
		De leis privatz,
		Vos diriatz
		So, s’ab leis jatz,
		Qu’i for’onratz
	60	L’emperaire !
VII		Domna, mos pens e mos entens
		E totz mos respechs·e mos cutz
		Es en vostra merce chazutz
		E prenda·us de me chauzimens ;
	65	Qu’eu·m sui d’un latz
		Pel col lassatz
		A vos donatz
		Et autreiatz,
		Car tan eratz
	70	De bon aire.
VIII		Domna, volhatz
		Que mos pensatz
		Sia vertatz
		E, s’a vos platz
	75	Ma volontatz,
		Me n’esclaire
IX		Domna, si·us platz,
		Merce n’aiatz
		E no·m fassatz
	80	Lonc mal traire !