Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,071 Autor: Giraut de Bornelh Gènere: Canso Número: X

 

Si·m plagues tan chans

I	1	Si·m plagues tan chans
		Com sol, derenans
		Chantera, mas fre
		A·i que m’en rete ;
	5	C’ar chans no m’es sals,
		Ans pert mos jornals
		Chantan, car quecs fui
		So que pretz adui
		E merma joi et avinen solatz
	10	On pert amors e pretz sas eretatz.
II		Mas eu sec sos mans,
		Sia·m pros o dans,
		E n’ai mal e be
		E s’a·i dir de que
	15	Sui amics ni cals
		E can planh mos mals,
		Gart on ni a cui,
		Tan tem lo fol brui,
		E, can respon, gart que dic ; car foldatz
	20	Es dicha leu, per qu’eu respon membratz.
III		Mas sobretalans
		Forsa·ls ben-amans
		C’a penas s’en te
		Negus, per qu’eu cre
	25	N’escha dans mortals.
		E doncs non es fals,
		Qui met son esdui
		En trop gran refui ;
		Pauc preza se e cilh a cui s’es datz,
	30	S’a descobert en ditz sas volontatz.
IV		Qui demand’a mans
		Dels cobes amans
		S’an domna, desse
		Diran: ‘No, qu’ilh me !’
	35	Mas eu no sui tals,
		Ans dic que leials
		Amics sui de lui
		Et em par amdui;
		Car quecs a so c’a dos tanh ab tan patz
	40	Que·lh bocha ditz per c’om es encolpatz.
V		Cel es drutz truans
		Que non es celans
		Sa domna ni se,
		Car sobr’altra re
	45	Deu gardar, sivals
		S’es amics corals,
		No·n gap ab altrui ;
		Car se eis destrui,
		S’az altra part n’es del conselh privatz ;
	50	Car ja non er per los altres celatz.