Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,053 Autor: Giraut de Bornelh Gènere: Canso Número: XI

 

Nulha res      A chantar no·m falh

I	1	Nulha res      A chantar no·m falh,
		Per que deu pro mos chans valer ;
		Qu’er ai be razon e lezer
		E loc e sazo de que chan,
	5	E mais d’aitan
		Me creis ma benanansa
		Qu’en bona cud’ai mon esper,
		Que·m toi temer
		E·m fai joi jauzir e solatz,
	10	E vei assatz
		C’obs m’es que mos chans se melhur,
		Pos en ma senha crit ‘Segur’.
II		Car non es      Drechs que chans nualh,
		Can de joi mou ni de plazer ;
	15	Car si s’encontron d’un voler
		Dui fin amic e d’un talan
		Que vas engan
		No penda la balansa,
		Chascus se deu contratener
	20	C’a so poder
		No·s volva ni·s vir al seu latz !
		C’amics amatz
		S’a cor que menta ni·s perjur,
		El’es on bran a mal aür.
III	25	Qu’eu c’ai pres      En man loc trebalh,
		De man mol lech man dur jazer,
		Lais ab alques de bo saber
		Ma rancur’e·m vauc adesman
		Que contral dan
	30	Clau ab bon’esperansa
		Tal fors’on poscha remaner.
		E si·m dis ver
		Mos senher, pro sui be fermatz :
		Ges no·m men’atz,
	35	Mas, de cui que·m clam ni·m rancur,
		Ab leis me remanh e m’atur.
IV		E merces,      Quez ab leis no valh !
		Res fors Deus no·m pot pro tener
		De peiurar ni de chazer
	40	E, pos eu ren als no·lh deman
		Mas qu’en cudan
		M’alarc ma benestansa,
		Membre·lh com m’afizet un ser
		Al seu maner
	45	So don me sui pois conortatz
		E, s’aissi·lh platz,
		Per l’amistat que·lh tenh li jur
		Que de ben-amar no peiur !
V		E s’eu ges      Per s’amor trassalh,
	50	Que·l trop no·n poscha sostener,
		Ni·lh m’enquer cal que no-dever,
		Franha·l fol orgolh mercean ;
		Que benestan
		L’er, si·m creis ni m’enansa.
	55	Qu’eu ai be vezut eschazer
		C’a l’estober
		Val vil tengutz e mesprezatz ;
		Qu’estanhs folhatz
		Es mes soven sotz bon azur
	60	Per que melhs tenh’e que mais dur.
VI		E si·m mes      En son assenalh
		E de so trach no·m posc mover,
		No·m lais de l’altrui colp doler,
		Mas fera·m ab un bel semblan !
	65	Qu’eu no·lh coman
		Fach, don ai’afiansa
		D’altr’amistat. Mas del vezer
		Can n’ac lezer
		L’adrechs cors e ben ensenhatz,
	70	No·m fo privatz,
		Ans, can poc far de clar escur,
		Me fetz barrera d’un prim mur.
VII		E fora m’en desconortatz,
		Tristz e forsatz
	75	Sobre totz; mas tan bon aür
		N’agui, per qu’eu sofer e dur.
VIII		E mos Folha te per tafur
		Celui que no·n cre bon aür.