Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,060 Autor: Giraut de Bornelh Gènere: Canso Número: XII

 

Can lo glatz e·l frechs e la neus

I	1	Can lo glatz e·l frechs e la neus
		S’en vai e torna la chalors
		E reverdezis lo pascors
		Et auch las voltas dels auzeus,
	5	M’es aitan beus
		Lo dolz tems a l’issen de martz
		Que plus sui salhens que leupartz
		E vils non es chabrols ni cers.
		Si la bela cui sui profers
	10	Me vol onrar
		D’aitan que·m denhe sofertar
		Qu’eu sia sos fis entendens,
		Sobre totz sui rics e manens.
II		Tan es sos cors gais et isneus
	15	E complitz de belas colors
		C’anc de rozeus no nasquet flors
		Plus frescha ni d’altres brondeus,
		Ni anc Bordeus
		Non ac senhor fos plus galhartz
	20	De me, si n’era coltz ni partz
		Tan que fos sos dominis sers,
		E fos apelatz de Bezers,
		Can ja parlar
		M’auziri’om de nulh celar
	25	Qu’ela·m disses, celadamens,
		Don s’aïres lo seus cors gens !
III		Bona domna, lo vostr’aneus
		Que·m donetz, me fai gran socors ;
		Qu’en lui refranhi mas dolors,
	30	E can lo remir, sui plus leus
		C’us estorneus
		E sui per vos aissi auzartz
		Que no tem que lansa ni dartz
		Me tenha dan n’acers ni fers.
	35	E d’altra part sui plus despers
		Per sobramar
		Que naus, can vai torban per mar
		Destrecha d’ondas e de vens ;
		Tan m’abelis lo pensamens.
IV	40	Domna, aissi com us chasteus
		Qu’es assetjatz per fortz senhors,
		Can la peirer’abat las tors
		E·ls chalabres e·ls manganeus
		Et es tan greus
	45	La guerra devas totas partz
		Que no lor te pro genhs ni artz
		E·l dols e·l critz es aitan fers
		De cels dedins quez an grans gers,
		Sembla·us ni·us par
	50	Que lor ai’obs merce clamar,
		Aissi·us clam merce umilmens,
		Bona domna pros e valens.
V		Domna, aissi com us anheus
		Non a forsa contr’ad un ors,
	55	Sui eu, si la vostra valors
		No·m val, plus frevols e’us rauzeus,
		Et er plus breus
		Ma vida ; que de cartel chartz,
		S’oimais me pren negus destartz,
	60	Que no·m fassatz drech de l’envers.
		E tu, fin’Amors, que·m sofers,
		Que deus garar
		Los fis amans de foleiar,
		Sias me chabdeus e guirens
	65	A ma domna, pos aissi·m vens !